QR Aqparat jáne qoǵamdyq damý vitse-ministri Bolat Tilepov elde bolǵan jappai tártipsizdikterge qatysty óz oiymen bólisip, azamattyq qoǵam uiymdarynyń usynysyn tyńdady, dep habarlaidy QazAqparat.
«Eldegi bolǵan jaǵdai bárimizge málim. Qazir qoldaý bildirip, basý aitý ǵana emes, naqty usynys qajet. Iske kóshetin ýaqyt keldi. Jappai tártipsizdikter elimiz boiynsha 12 alańda ótti. Oǵan qatysýshylardyń deni jastar. Olar kimder? Kóbisi jumyssyz, úi-kúii joq jastar. Kóbi aýyldan shyqqan jáne qazaqtildi jastar. Osy jerde suraq týyndaidy «eldegi jappai tártipsizdik kezinde qai úkimettik emes uiym ókilderi alańǵa shyǵyp olarǵa basý aityp, aqylǵa shaqyrdy?» Eshkim shyqqan joq. Azamattyq jáne úkimettik emes uiymdar memlekettik organdarmen birlesip durys jumys jasai almai otyr. Bizde quzyrly organ retinde qoǵamdyq jáne úkimettik emes uiymdardan naqty usynys kerek. Biz óz kezegimizde qaraýǵa ázirmiz», - dedi Bolat Tilepov.
Ministr orynbasarynyń málimdeýinshe, qoǵam máselesi memleket pen azamattyq ortanyń ózara áreketiniń nátijesinde oń sheshimin tabady.
«Men búgingi jiynǵa sizderdi tyńdaý úshin keldim. Jiyn qorytyndysy boiynsha usynystaryńyzdy jinap, joǵaryǵa jetkizetin bolamyz», - deidi ol.
