Foto: QR Májilisiniń baspasóz qyzmeti
Májilis depýtaty Anas Baqqojaev blogerlerdiń jaýapkershiligin zańnamalyq turǵyda bekitýdi usyndy, dep habarlaidy Sputnik Qazaqstan.
Depýtattyń aitýynsha, qazir ózin blogermin dep júrgenderdiń deni – aqparattyń ras-ótirigin teksermei, ońai jolmen baiý maqsatynda kez kelgen adamǵa jala jabýdan taiynbaityn, bopsalap aqsha tabatyn, ataqqumar, eldiń berekesin buzyp, qaýipsizdigine qater tóndiretin saýatsyz adamdar.
"Dál osy blogerler talai jyldan beri umyt bolǵan qarjylyq piramidanyń jandanýyna da sebep bolǵanyn bárimiz jaqsy bilemiz. Sol alaiaqtarǵa senip qalǵan qanshama adam sýitsid jasady, qanshaýy densaýlyǵynan airyldy, taǵy qanshamasy úisiz-kúisiz qalyp, qańǵyryp ketti?! Olardyń obaly kimge? Elde bolyp jatqan túrli áleýmettik jaǵdailardy óz yńǵaiyna burmalap, oǵan ultaralyq reń berip, elge jalǵan aqparat taratqan blogerlerdiń de isi maishammen qaralýy kerek edi. Rastalmaǵan qaýesettiń áleýmettik jeli arqyly tez taraýynan Qordai oqiǵasynyń nemen aiaqtalǵany bárińizge málim", - dedi Baqqojaev premer-ministr men bas prokýrorǵa joldaǵan depýtattyq saýalynda.
Aitýynsha, jeke azamattardyń ishken-jegenin, kigen kiimine deiin ańdyp, qoǵamda kiberbýlling jasap júrgen blogerler toby taǵy bar. Ómirge degen kózqarasy endi qalyptasyp kele jatqan jastar osy blogerlerge eliktep júr.
"Biz qysqa ǵana ýaqyt ishinde sózi men isine jaýap bere almaityn blogerlerdiń otanyna ainalyp ketkendeimiz. Bul – qoǵam úshin de, memleket úshin de qaýipti qubylys. Al, munyń bári bizdegi zańnamada bloger mártebesi aiqyndalmaǵannan. Jaýapkershiliktiń joq ekenin sezingen mundai adamdar árine, oiyna kelgenin isteidi", - dep ashyndy depýtat.
Bul rette Baqqojaev kópke topyraq shashýdan aýlaq ekenin, halyqqa shyn janashyr blogerler de bar ekenin atap ótti.
"Biraq, áleýmettik jelilerin paidalanyp, azamattar men uiymdardyń quqyǵy men zańdy múddelerine ziian keltiretin jalǵan aqparat taratqany úshin olarǵa qoldanylatyn shara qarastyrylmaǵan. Sol sebepti olarda eshqandai jaýapkershilik joq. Artyn zerttep, shyndyq pa, joq pa bastaryn qatyrmaidy. Bastysy shý. Bastysy sóz. Kimniń bolmasyn aldynda tikeńdep, betten alyp, jeke basyna tiisedi. Sóz bostandyǵy degen osy ma? Biz osylaisha tutastai bir mamandyqty qor qylyp otyrmyz. Jýrnalisterdiń kóbi jumyssyz! Olardyń bilimi de, talaby da bar. Olardyń blogerlerden aiyrmashylyǵy – ádepti, sondyqtan da jumyssyz", - deidi májilismen.
Ol bir jyl buryn prezident memlekettiń múddesin, qoǵamnyń suranysyn jáne mediasalanyń damý úrdisin eskerip, BAQ týraly zańdy qaita qaraýdy tapsyrǵanyn eske saldy. Alaida, aitýynsha, bul zań áli daiyn emes.
"Sondyqtan, birinshiden, atalǵan zań jobasyna jaýaptylardyń áreketine tiisti baǵa berilýi kerek. Ekinshiden, tez arada BAQ týraly zańdy pysyqtap, májilistiń ashyq talqylaýyna engizý qajet. Aqparat salasyndaǵy jaýapkershilikti tek jýrnalister emes, blogerler de sezinetin ýaqyt jetti", - dedi Baqqojaev.
Depýtat blogerlerdiń jaýapkershiligin osy zań jobasy aiasynda dereý qarastyrý qajet ekenin aitty. Sebebi jaýapkershilikti túsine almaityn blogerlerdiń sany ýaqyt ótken saiyn artyp barady.
