QR Aqparat jáne qoǵamdyq damý ministrligi jalpyulttyq aza tutý kúni buqaralyq aqparat quraldaryn retteý jáne saitty rásimdeý boiynsha usynymdar jariialady, dep habarlaidy "Ult aqparat".
«Jalpyulttyq aza tutý kúni eń aldymen BAQ qyzmetinde jáne olardyń internet-resýrstaryn rásimdeýge bailanysty birqatar sharalardyń saqtalýy quptalady. Jalpyulttyq aza tutý kúni media-saittardyń joǵarǵy bóligine oqiǵa bolǵan kúndi jáne «Qazaqstan Respýblikasyndaǵy jalpyulttyq aza tutý kúni» degen jazýy bar banner ornalastyrý usynylady. Bannerdiń túsi qara, mátinniń túsi aq bolýy kerek. Mátinniń tili paidalanýshy tańdaǵan tildik nusqaǵa bailanysty ózgerýi tiis. Banner arqyly oqyrman qaiǵyly oqiǵa týraly aqparattardy ashýy kerek. Saittyń tutas tústik gammasyn qara jáne aq tústerge ózgertińiz. Telearnalardyń logotipin aq-qara túske boiaýǵa bolady», - dep jazylǵan ministrliktiń resmi habarlamasynda.
Jalpyulttyq aza tutý kúni barlyq BAQ saittarynan jarnamalyq bannerlerdi, kóńil kóterý jáne interaktivti elementterdi, mýzykalyq súiemeldeýdi alyp tastaý usynylady. Jalpyulttyq aza tutý kúnine bailanysty barlyq materialdarda pikir jazý fýnktsiiasyn óshirý qajet. Mundai shara oqiǵa týraly kóptegen jaǵymsyz pikirlerdiń aldyn alady.
«Aza tutý kúni barlyq BAQ (baspa, internet-resýrstar, teledidar jáne radioarnalar) oiyn-saýyq materialdaryn jariialamaǵany lázim. Radioarnalarǵa tynysh, baiaý yrǵaqty (otandyq) mýzykalyq týyndylardy qoiý usynylady. «Jarnama týraly» Zańnyń 8-babynyń 4-tarmaǵyna sáikes, barlyq telearnalar men radioarnalar kestesinen jarnamalar alynýy tiis. Sondai-aq, basylym betterinde de jarnamalyq materialdardy alyp, túrli-tústi betterdi aq-qaraǵa aýystyrǵan jón», - delingen habarlamada.
Barlyq aqparat quraldaryna arandatýshylyq fotosýretterdi, sonyń ishinde máiitterdiń, qannyń sýretterin jariialamaý suralady. Telearnalarda tańǵy jáne efir sońynda gimn oryndalǵannan keiin qaza tapqandardy eske alý úshin bir minýt únsizdik jariialap, jalpyulttyq aza sebepterin kórsetý usynylady.
