Qazaqstan Respýblikasynyń Memlekettik hatshysy Gúlshara Ábdiqalyqovanyń tóraǵalyǵymen Qazaqstan Respýblikasynyń Prezidenti janyndaǵy Sybailas jemqorlyqqa qarsy is-qimyl máseleleri jónindegi komissiianyń otyrysy ótti, dep habarlaidy "Ult aqparat" Aqordanyń baspasóz qyzmetine silteme jasap.
Basqosýda jer qatynastary salasynda zańdylyqty saqtaý máseleleri, sondai-aq bilim berý isinde biýdjet qarajatyn tiimdi paidalanýdy qamtamasyz etý úshin qabyldanyp jatqan sharalar talqylandy. Bas prokýratýranyń, Memlekettik qyzmeti isteri jáne sybailas jemqorlyqqa qarsy is-qimyl agenttiginiń, Respýblikalyq biýdjettiń atqarylýyn baqylaý jónindegi esep komitetiniń, Aýyl sharýashylyǵy, Bilim jáne ǵylym ministrlikteriniń baiandamalary tyńdaldy.
Jiyndy ashqan Gúlshara Ábdiqalyqova sybailas jemqorlyqqa qarsy is-qimyl Qazaqstanda memlekettik saiasattyń mańyzdy strategiialyq basymdyǵy retinde qarastyrylatynyn aitty. Elbasy N.Á.Nazarbaev Qazaqstan halqyna arnalǵan qańtardaǵy Joldaýynda sybailas jemqorlyqpen kúresti jalǵastyrý qajettigin beker atap ótken joq.
Jer qatynastary sybailas jemqorlyq beleń alǵan salanyń biri bolyp sanalatynyn tájiribe kórsetip otyr. Tek sońǵy eki jarym jyl ishinde bul sala boiynsha sybailas jemqorlyqqa qarsy qyzmet 457 qylmysty tirkegen. 78 adam sottaldy. Prokýrorlyq tekseris nátijesi boiynsha, jer qatynastaryn retteitin zańnamany buzǵany úshin 342 adam túrli jaýapkershilike tartyldy, sonyń ishinde 25 qyzmetshi memlekettik qyzmettiń bedeline nuqsan keltirgeni úshin jaýapty boldy. Osyǵan bailanysty múddeli memlekettik organdardyń nazary jer týraly zańnamany, jeke baspana qurylysy úshin jer telimderin berý kezindegi kezektilik tártibin jáne memlekettik qyzmet kórsetý merzimin saqtaý, kommertsiialyq jerlerdi aýktsionsyz ielenýge jol bermeý qajettigine aýdaryldy.
Memlekettik hatshy bilim berý isin qarjylandyrýǵa memleketten mol qarjy bólinip otyrǵanyna toqtaldy. Sonymen qatar, 2016 jyldan beri bul salada sybailas jemqorlyqqa qatysty 510 qylmys tirkelip, 178 adam sottalǵan. Áleýmettik saýalnamalar joǵary oqý oryndaryndaǵy bilim berý isinde, mektepke deiingi mekemelerdegi balalarǵa oryn bólý barysynda sybailas jemqorlyq deńgeii joǵary ekenin kórsetedi.
Talqylaý nátijesi boiynsha Komissiia ókiletti memlekettik organdarǵa anyqtalǵan zań buzýshylyqtarǵa qatysty taldaý júrgizý jáne qylmystyń aldyn alatyn tiisti tetikter ázirleý úshin sharalar qabyldaý jóninde tapsyrma berdi.
Sońynda G.Ábdiqalyqova elimizde sybailas jemqorlyqsyz quqyqtyq memleket qalyptastyrý úshin júrgizilip jatqan reformalar Qazaqstan Respýblikasynyń 2025 jylǵa deiingi strategiialyq damý josparynyń basty mindetterine qol jetkizýge baǵyttalýy kerek ekenin aitty. Bul – jedel ári sapaly ekonomikalyq ósim jáne halyqtyń ál-aýqatyn arttyrý.
