Aqmola oblysynda alkogol ónimin satýshy óziniń jumys ornynda gashish saýdalaǵan, dep habarlaidy QazAqparat oblystyq ishki saiasat basqarmasyna silteme jasap.
Aqmola oblystyq politsiia departamentiniń baspasóz qyzmetiniń málimetinshe, elorda mańyndaǵy eldi mekenniń 39 jastaǵy turǵyny uzaq ýaqyt boiy gashish paidalanyp kelgenin anyqtaldy. Ol saýda úiinde alkogol ónimderin satýmen ainalysqan. Keiin alkogol ónimderimen birge esirtki zatyn satýdy qolǵa alady.
«Kúdikti «ónimdi» tek qupiia sóz arqyly satqan. Iaǵni, satylymda joq alkogol ónimniń qupiia sózin aitqan adamǵa ǵana esirtki satqan. Osyndai 5 gramnan astam gashish satý kezinde ony politsiia qyzmetkerleri qolǵa túsirdi», - dedi Esirtki qylmysymen kúres basqarmasynyń aǵa jedel ýákili, politsiia maiory Ráziia Kýrsanova.
Vedomstvodan atap ótkendei, qazannyń 2-inde esirtki satýshy ustaldy. Jumys orny boiynsha sanktsiialanǵan tintý barysynda quramynda erekshe iisi bar sur-jasyl tústi untaq tárizdi konsistentsiialy zaty bar polietilen túiinshek tabyldy. Saraptama taǵaiyndaldy.
«Osyǵan bailanysty Qylmystyq kodekstiń 1-shi baby 297-shi bóligi (esirtki zattaryn zańsyz ótkizý) boiynsha qylmystyq is qolǵa alyndy. Kúdiktige qatysty bultartpaý sharasy tańdaldy. Atalmysh baptyń sanktsiiasyna sáikes, er adam 10 jylǵa deiin bas bostandyǵynan aiyrylýy múmkin», - dep tolyqtyrdy Kýrsanova.
