Aqmolalyq diqandar kóktemgi egis jumystaryna ázirlenýde. Biylǵy jyly oblys boiynsha 4,9 million gektar egistik alqapqa dán sebý josparlanǵan, dep habarlaidy "Ult aqparat" tilshisi oblystyq ishki saiasat basqarmasyna silteme jasap.
Oblystyq aýyl sharýashylyǵy basqarmasynyń málimetinshe, aýyl sharýashylyǵy daqyldarynyń ishinde jazdyq bidaiǵa basymdyq berilip otyr.
Kóktemgi dala jumystaryn uiymshyldyqpen ótkizý arqyly mol ónim alýǵa bolady. Osyny túsingen aqmolalyq diqandar naýqanǵa qyzý kirisip otyr.
«Oblysta arzandatylǵan baǵamen 70 myń tonna kepildendirilgen dizel otyny bólindi. Jalpy, aýyl sharýashylyǵy tehnikasynyń daiyndyǵy - 98 paiyz. Jańa 133 tehnika satyp alyndy», - dedi vedomstvodan.
Tuqym daiyndaý jáne tyńaitqyshtarmen jumys isteý máselesine erekshe nazar aýdarylady.
Búginde oblysta akkredittelgen zerthanalarda 450 myń tonnadan astam tuqymǵa tolyq taldaý júrgizilýde.
Mineraldy tyńaitqyshtardy jetkizýge sharttar jasaldy. Jarqaiyń aýdanynyń «Temirlan» JShS direktory Erlan Alin bolashaq egis alqaby týraly óz josparyn bólisti.
«Biyl bizde 45 myń gektar jerge egin egý mindeti qoiylǵan, onyń 41 myń gektarynan astamyna bidai, 3 myń gektaryna arpa, 200 gektaryna suly men qaraqumyq egiledi. Egis jumystaryn mamyr aiynyń ortasynda bastaýdy josparlap otyrmyz», - dedi kásipker.
Fermerlerge «Keń dala» baǵdarlamasy boiynsha jyldyq 5 paiyzben arzandatylǵan nesie túrinde memlekettik qoldaý kórsetiledi.
Diqandardy qoldaý retinde 17 milliard teńge qarjy bólinip otyr.
Aita keteiik, aǵymdaǵy jyly oblys diqandary 4,9 million gektarǵa tuqym sebýdi mejelep otyr.
Onyń 4,5 million gektary – dándi burshaq daqyldary, 216 myńy - maily daqyldar, 200 myńy - jazdyq daqyldar, sondai-aq, 15,6 myń gektarǵa kartop jáne 3,4 myńnan astam gektarǵa kókónis otyrǵyzylady.
