Elbasy Nursultan Nazarbaevtyń «Bolashaqqa baǵdar: rýhani jańǵyrý» baǵdarlamalyq maqalasynda alǵa qoiylǵan mindetterdi júzege asyrý aiasynda Zerendi aýdany Qonysbai aýylynyń Abai orta mektebinde «Rýhani jańǵyrý» murajai kabineti ashyldy. Aita ketýimiz kerek, Aqmola oblysyndaǵy orta bilim beretin mektepterde barlyǵy osyndai 40 kabinet ashylǵan.
Saltanatty shara mektep oqýshylarynyń shuǵylaly biimen bastalyp, jiynǵa qatysqan qurmetti qonaqtardyń ystyq yqylasymen jalǵasyn tapty. Atalmysh igi sharaǵa Aqmola oblystyq máslihatynyń depýtaty Nartai Ysqaqov, oblystyq bilim basqarmasy basshysynyń orynbasary Botagóz Dúisenova, Zerendi aýdany ákiminiń orynbasary Raihan Ǵabdýllina, Aqmola oblystyq ólketaný murajaiynyń direktory Qýanysh Shaqshaqov jáne taǵy basqa laýazymdy qyzmetkerler men ardager ustazdar, mektep ujymy qatysty.
– Tuńǵysh Prezident Nursultan Ábishuly Nazarbaevtyń «Bolashaqqa baǵdar: rýhani jańǵyrý» baǵdarlamalyq maqalasy el damýynyń jarqyn úlgisi men naqty qadamdaryn kórsetetin keleli oi, saliqaly pikir, batyl sheshimderge negizdelgen mańyzdy qujat. Tarih – týǵan jerden bastalady. Ár mektepte óz murajaiynyń bolýynyń mańyzdylyǵy óte zor, óitkeni, murajai – halqymyzdyń rýhani-mádeni bailyǵy. Búgin Zerendi aýdanynda alǵashqy bolyp Qonysbai aýylynyń Abai orta mektebinde «Rýhani jańǵyrý» kabineti ashylǵaly tur, – dei kelip aýdan ákiminiń orynbasary óz sózin júrekjardy tilegimen túiindedi.
Saltanatty jiynda Aqmola oblystyq máslihatynyń depýtaty Nartai Ysqaqov, Aqmola oblystyq bilim basqarmasynyń basshysy Botagóz Dúisenova, oblystyq «Rýhani jańǵyrý» óńirlik jobalyq keńsesiniń basshysy Qairat Niiazbekuly, talai jyl mektep direktory qyzmetin atqarǵan, eńbek ardageri Qaidar Bekenov sóz sóiledi. – Zerendi aýdany ejelden tanymal tulǵalarǵa, qasietti jerlerge bai el. Elimizdiń bai tarihyn, halqymyzdyń rýhani qundylyqtaryn nasihattaý maqsatynda qurylǵan «Rýhani jańǵyrý» murajai kabineti óskeleń urpaqtyń boiynda eljandylyq siiaqty abzal qasietterdi damytyp, óz tarihyn tanyp bilýge zor septigin tigizetini anyq,– dei kelip, ardager ustaz óziniń kópten beri shejire tarihqa bailanysty derekterdi kóziniń qarashyǵyndai saqtap, jinaqtap júrgenin basa aityp, aldaǵy ýaqytta osynyń barlyǵyn atalmysh murajai-kabinetke tartý etetindigin jetkizdi.
«Rýhani jańǵyrý» kabinetiniń kók lentasyn oblystyq máslihattyń depýtaty Nartai Ysqaqov pen oblystyq bilim basqarmasy basshysynyń orynbasary Botagóz Dúisenova qiyp, saltanatty túrde ashty.
Murajai kabinet ulttyq naqyshta bezendirilgen. Bir buryshynda aýyl tarihynan habardar eter kóne jádigerler ornalasqan. Latyn grafikasyna negizdelgen qazaq tili álipbiin de ázirlep ilip qoiypty. Aýdannyń kieli jerleri, Botai mádenieti, Qumai eskertkishi, «Uly dalanyń jeti qyry» týraly aqparattar bar. Sonymen qatar, qazirgi zamanǵa sai elektrondyq kitaphanada ornalasqan. – Aldaǵy ýaqytta bul kabinette synyp jáne tárbie saǵattary, ulttyq qundylyqtardy nasihattaityn taqyryptyq keshter, mádeni is-sharalar ótkizilip turady. Kez-kelen mektep oqýshysy eliniń, ósken jeriniń tarihyn zerdelep oqimyn dese, osy jerden bar aqparatty alýyna bolady. Kabinettiń ózin ulttyq naqyshta bezendirýge tyrystyq. Aldaǵy ýaqytta dóńgelek ústel qoiyp, osy jerde oi-talqylar, jiyndar ótkizemiz dep josparlap otyrmyz. Bul kabinet kompiýtermen de jabdyqtalatyn bolady, –deidi mektep direktory.
Prezident Qasym-Jomart Toqaev Nur-Sultan qalasynda ótken respýblikalyq tamyz máslihatynda Qazaqstanda qala men aýyl balalarynyń bilim deńgeiinde aiyrmashylyq bolmaýy kerek dep atap ótti. Ol óz sózinde: «Bilim berý standarttary biryńǵai bolýy kerek. Bul bilim berý baǵdarlamalaryna da qatysty. Balalardyń bári turyp jatqan jerine nemese ata-anasynyń áleýmettik mártebesine qaramastan birdei sapaly bilim alýy kerek. Bilim jáne ǵylym ministrligine tabysy tómen otbasylardan shyqqan nemese kúrdeli áleýmettik jaǵdaida jumys istep, tómen nátije kórsetip júrgen mektepterde oqityn balalardyń akademiialyq úlgermeýshiligin joiý týraly arnaiy baǵdarlama jasap iske qosýdy tapsyramyn, – dedi Qasym-Jomart Toqaev. Kúni keshe Abai aýylynda ashylǵan «Rýhani jańǵyrý» murajai kabineti aýyl balalarynyń sapaly bilim, sanaly tárbie alýyna zor yqpalyn tigizeri anyq. Aýdannyń tańdaýly mektebiniń jetistikteri tańdanarlyqtai. Al, aýyl mektebiniń materialdyq jaǵdaiy qalai? Bul oilantarlyq másele…
Bizdiń baiqaǵanymyz, ustazdar ujymy men aýyl balalarynyń bilimge degen umtylysy maqtaýǵa turarlyq. Ámanda osylai bolǵany abzal ǵoi.
Ulmeken Tynyshtyqqyzy
