Aqmola oblysynda orta mektep keńse jihazyn negizsiz satyp alǵan. Bul týraly Antikor ortalyǵy alańynda ótken onlain-brifingte «Aqmola - adaldyq alańy» jobalyq keńsesiniń jetekshisi Samira Taitenova aitty, dep habarlaidy "Ult aqparat".
Spikerdiń aqparaty boiynsha, Aqmola oblysynda biýdjet qarajatynyń tiimdi paidalanylýyn baqylaý maqsatynda turǵyndardyń biri Publicbudget.kz ashyq biýdjetterdiń interaktivti kartasynyń saityna óz betinshe monitoring júrgizgen.
Monitoring barysynda Býrabai aýdanynyń orta mektebi jalpy somasy 65 000 teńgege keńse jihazdaryn satyp alýdy josparlaǵany anyqtaldy, alaida biýdjet qarajatyn tiimdi jumsaý jáne únemdeý rejimin kúsheitý maqsatynda mamyr aiynan bastap jergilikti atqarýshy organdardyń keńse jihazyn satyp alýyna ýaqytsha tyiym salyndy.
«Osyǵan bailanysty azamat oqý ornyna shaǵym túsirdi, alaida mektep bul jihazdy satyp alǵany belgili boldy. Ótinish negizinde anyqtalǵan buzýshylyqtar úshin Býrabai aýdanynyń bilim bólimi bilim mekemesiniń laýazymdy tulǵasyn tártiptik jazaǵa tartty», - dedi Samira Taitenova.
Spiker atap ótkendei, bul mysal - memlekettik organdardyń halyqpen keri bailanysynyń ornatylýynyń jáne azamattardyń ótinishterine jedel den qoiýdyń aiǵaǵy. Al interaktivti karta memleket pen qoǵam arasyndaǵy ózara is-qimyldyń tiimdi dialogtyq platformasyna ainalady.
Aita keteiik, árbir turǵyn Ashyq biýdjetterdiń interaktivti kartasy arqyly mektepterdiń, balabaqshalardyń, aýrýhanalardyń, emhanalardyń, óńir joldarynyń biýdjet aqshasynyń biryńǵai platformada qalai, ne úshin jáne qansha mólsherde jumsalatynyn kóre alady, sondai-aq ashyqtyqty qadaǵalap, onyń damýyna áser ete alady.
