Aqmola oblysynyń Bulandy aýdanynda mamonttyń súiegi tabyldy, dep habarlaidy "Ult aqparat" oblystyq tarihi-mádeni murany qorǵaý jáne paidalaný ortalyǵyna silteme jasap.
Ortalyq mamandarynyń málimetinshe, mamonttyń súiegi Novobratsk aýyldyq okrýgine qarasty Býdennovka aýylynyń mańynan aǵyp ótetin Arshaly ózeniniń jaǵasynan tabylǵan. Ony osy aýyldyń jergilikti turǵyny Valerii Dýbovik kezdeisoq taýyp alyp, keiin tiisti organdarǵa habarlaǵan. Mamonttyń súiegi tabylǵan jerge oblystyq tarihi-mádeni murany qorǵaý jáne paidalaný ortalyǵynyń direktory Serik Ysqaqov pen mamandary bardy.
«Elimizdegi epidemiologiialyq jaǵdaiǵa, COVID-19 koronavirýstyq infektsiiasynyń taralýyna jáne karantindik rejimniń engizilýine, túrli is-sharalardy ótkizýge tyiym salynýyna bailanysty, Ortalyq tabylǵan mamont súiegin odan ári tereń zertteýge Qazaqstan Ulttyq mýzeiiniń ǵalymdaryn shaqyra otyryp, osy jerde arheologiialyq qazba jumystaryn júrgizý úshin 2021 jylǵy josparǵa engizý mindetin alǵa qoiyp otyr», - deidi Serik Ysqaqov.
Oblystyq tarihi-mádeni murany qorǵaý jáne paidalaný ortalyq mamandary atap ótkendei, kezdeisoq olja ǵalymdar men zertteýshilerge, ǵylymi-zertteý protsesinde qyzyqty bolyp, janýarlardyń tirshilik etý ortasyn keshendi zertteýge múmkindik beredi dep otyr.
Eske sala ótsek, osyǵan deiin alyp janýarlar súiekteri Zerendi, Shortandy, Jaqsy, Tselinograd aýdandarynda tabylǵan bolatyn. Bul joly tabylǵan súiek osydan 10 myń jyl buryn ómir súrgen mamonttyń súiegi bolýy múmkin. Onyń uzyndyǵy 1,5 metrdi quraidy. Qalyńdyǵy 30 sm jaqsy saqtalǵan.
Qazirgi tańda, atalmysh mamonttyń súiegi dáiekti ári egjei-tegjeili zertteý úshin Aqmola oblystyq tarihi-ólketaný mýzeiine tapsyryldy.
