Foto: canva.com
Arshaly aýdanynyń Balalar men jasóspirimderdiń sport mektebiniń shańǵy sport jattyqtyrýshysy esirtki zattaryn zańsyz satqany úshin sottaldy, dep habarlaidy «Ult aqparat» Aqmola oblysy soty baspasóz qyzmetine silteme jasap.
Er adam Astana qalasynan Arshaly aýdanynda satý maqsatynda esirtki tasymaldaý kezinde ustalǵan. Onyń avtokóligin tintý kezinde júk salǵyshtan jalpy salmaǵy 39 kg-nan asatyn 4 paket gashish tabylyp, tárkilendi.
Osylaisha, er adam Qylmystyq kodekstiń 297-babynyń 3 bóligi 3 bólimshesi boiynsha (esirtki zattaryn, satý úshin asa iri mólsherde zańsyz satyp alý, saqtaý, tasymaldaý) qylmys jasaǵan.
Sottalýshynyń kinási onyń avtokóligin tintý jáne esirtki zattary salynǵan paketterdi alý hattamasymen, sarapshylardyń qorytyndylarymen, tirkelgen qońyraýlary bar uialy telefondy tekserý hattamasymen, beinekameralardyń jazbalarymen, tintý hattamalarymen jáne kýágerlerdiń aiǵaqtarymen dáleldendi.
Jaza taǵaiyndaý kezinde sot jeńildetetin mán – jailardy, iaǵni, sottalýshyda kishkentai balalarynyń baryn jáne aýyrlatatyn mán-jailardyń bolmaýyn eskerdi.
«Aqmola oblysynyń mamandandyrylǵan aýdanaralyq qylmystyq sotynyń úkimimen er adamǵa 10 jylǵa bas bostandyǵynan aiyrý jazasy taǵaiyndaldy. Tárkilengen esirtki quraldary joiyldy. Sot úkimi zańdy kúshine engen joq», - dedi vedomstvodan.
Aita ketsek, budan buryn esirtki zerthanasyn qurǵan aqmolalyq 14 jylǵa sottalǵanyn jazǵan edik.
