Aqmola oblysynda 58 jylqyny urlaǵan kúdiktiler ustaldy, dep habarlaidy "Ult aqparat" oblystyq PD baspasóz qyzmetine silteme jasap.
Vedomstvonyń málimetinshe, 2019 jylǵy qyrkúiektiń 17-de Ereimentaý aýdandyq politsiia bólimine jergilikti turǵynnan aryz túsken. Onyń sózinshe, jaiylyp júrgen 58 jylqysy joǵalǵan. Shyǵyn kólemi - 17 million teńge.
«Aqmola oblysynyń PD kriminaldy politsiia qyzmetkerleri men Ereimentaý aýdanynyń politseileri júrgizgen jedel-izdestirý sharasy barysynda Tselinograd aýdany jáne Nur-Sultan qalasynyń 26 jáne 41 jastaǵy turǵyndary ustaldy. Tergeý kezinde anyqtalǵandai, kúdiktiler qaraýsyz jaiylyp júrgen jylqylardy Ereimentaý aýdanynan aidap áketip, Arshaly aýdanynyń Qostomar aýylyndaǵy sharýashylyq qorasyna qamaǵan. Keiin «MAN» júk kóliginiń konteinerine tiep, Nur-Sultan qalasyna jetkizbek bolǵan. Alaida, arada birer saǵat ótkende biraz jylqy aýa jetpei konteinerdiń ishinde tunshyǵyp, ólip qalǵan», - deidi vedomstvodan.
Osyǵan deiin habarlanǵandai, Nur-Sultan qalasynan Kókshetaý baǵytynda 200 metr qashyqtyqta jylqylardyń óleksesi tabylǵan edi. Anyqtalǵandai, janýarlar kúdiktilerdiń júk kóliginen túsirilgen.
«Qazirgi kezde mal urlyǵyna qatysty QR QK 188-babynyń 4-bóligi boiynsha is qozǵalyp, sotqa deiingi tergeý júrgizilýde. Kúdiktiler ýaqytsha ustaý oqshaýlaǵyshyna qamaldy», - dep tolyqtyrdy vedomstvodan.
