Aqmola oblysynyń dári-dármek qoimasy 35 100 dana Pfizer vaktsinamen tolyqty, dep habarlaidy QazAqparat tilshisi oblystyq densaýlyq saqtaý basqarmasynyń baspasóz qyzmetine silteme jasap.
Vedomstvonyń málimetinshe, vaktsina Aqmola oblysyndaǵy -80-90 gradýs temperatýra aralyǵynda jumys isteitin 2 tońazytqysh kamerasyna ornalastyryldy. Odan bólek, 1 dana avtorefrejitor jańadan satyp alyndy. Qurylǵy minýs jáne pliýs kez-kelgen temperatýrada qalypty jumys isteidi.
«Aldaǵy dúisenbiden bastap vaktsina ózge aimaqtarǵa tasymaldanatyn bolady. Atalǵan vaktsinamen, eń aldymen balalar, 12-17 jas aralyǵyndaǵy jasóspirimder men júkti áielderge (16-37 aptadaǵy júktilik merzimindegi aiaǵy aýyr kelinshekterge), bosanǵanyna 42 kún tolǵan bala emizetin analarǵa salynatyn bolady», - dedi vedomstvodan.
Qazirgi tańda Aqmola oblysy aýdandyq aýrýhanalar ekpe maýsymyna daiyn.
«Meditsinalyq uiymdar, mektepter, meditsinalyq qyzmetkerler arnaiy ádistemelik daiarlyqtan ótip, tolyq attestatsiialandy. Ekpe egý jumystaryna ruqsat aldy. Dál osy sátte ata-analardyń kelisimin alý úshin aqparattandyrý júrgizilip jatyr. Aýdandarda túsindirme jumystary qarqyndy júrýde. Oǵan jaýapty arnaiy mamandar bekitildi. Ekpe egetin brigadalar jumysqa kirisýge ázir», - dep tolyqtyrdy vedomstvodan.
