Jaqynda Aqmola oblysy qalamgerleriniń úzdik on shyǵarmasy aýdio kitap bolyp jaryq kóredi. Bul týraly olystyq "Rýhani jańǵyrý" jobalyq keńsesi ókilderi habarlady.
"EL Jastar" teatry men "Rýhani jańǵyrý" Óńirlik jobalyq keńsesiniń birlesken jobasy Aqmola oblysy Ishki saiasat basqarmasynyń qoldaýymen júzege asady.
"Búgin basqarma basshysy Ǵalym Shoikin teatrdyń art-direktory Hákim Hasanbai men "Rýhani jańǵyrý" Óńirlik jobalyq keńsesiniń basshysy Qairat Seitqazindi qabyldap, aýdio kitaptardy tezirek oqyrmanǵa usynýdy tapsyrdy", - deidi jobalyq keńse mamandary.
Alǵashqy tańdap alynǵan shyǵarma - Sáken Seri Júnisovtiń "Aqan seri" romany. Búginnen bastap teatr akterleri "ZhakonDRA Films" stýdiiasynda kitaptyń aýdio nusqasyn jaza bastaidy.
Aita ketsek, Aqmola óńirinde "Rýhani jańǵyrý" baǵdarlamasy boiynsha ádebiet salasyn qoldaýǵa baǵyttalǵan birqatar jumystar qolǵa alynǵan. Atap aitsaq ótken jyly «Nur Otan» partiiasy Aqmola oblystyq filialynyń qoldaýymen bir top jas aqynnyń jyr jinaqtary kitap bolyp basylyp shyǵaryldy. Sondai-aq, QR Prezident Ákimshiligi men Qazaqstan Jazýshylar odaǵynyń birlesken jobasy - "Ádebi ólketanýdy damytý" atty aýqymdy joba da Aqmola oblysynan bastaý aldy. "Rýhani jańǵyrý" baǵdarlamasy aiasynda júzege asatyn úlken ádebi-mádeni sharalardyń biri sanalatyn bul respýblikalyq jobany júzege asyrýǵa Aqmola oblysynyń ákimdigi birinshi bolyp ynta-yqylas bildirdi.
Sonymen qatar, «Jahandaǵy zamanaýi qazaqstandyq mádeniet» arnaiy jobasy aiasynda Londonda aǵylshyn tilinde Sáken Júnisovtyń «Zamanai and Amanai» povesi jaryq kórdi. Keńes Odaǵynyń Batyry, jazýshy Málik Ǵabdýllinniń 11 tomdyq shyǵarmalar jinaǵy jáne «Málik Ǵabdýllin - Uly dalanyń maqtanyshy» atty albom-kitaby, professor Qadyrjan Ábýevtiń «Aqmola oblysynyń tarih jáne mádeniet qairatkerleri» atty bibliografiialyq ocherki shyǵaryldy, jazýshy-pýblitsist Jabal Erǵalievtiń ««Álemge! Ǵaryshqa! Bolashaqqa jol ashqan Tuńǵysh!» kitaby men «Aqan seri» jinaǵy, Aqmola oblysy týraly «Jer jánnaty» atty qazaq, orys jáne aǵylshyn tilderinde fotokitap jaryq kórdi.
