Ákimdikter tarapynan jerdi berý tártibi buzylyp jatyr. Bul týraly «Kásipkerlik salasyndaǵy prokýratýra qadaǵalaýy» atty biznesti qorǵaý jónindeni III forýmda QR Bas prokýrorynyń orynbasary Marat Ahmetjanov málim etti, dep habarlaidy QazAqparat.
Qazirgi kezde prokýratýra organdary jer telimin berý máselelerin tekserip jatqandyǵyna toqtalǵan ol: «Ákimdikter tarapynan jerdi berý tártibi buzylyp jatyr, túrli shemalardy iske asyrýǵa tyrysady. Jer ýchaskeleri boiynsha alyp-satarlyq jaǵdaiy beleń alýda. Aýktsiondar júrgizilmeidi. Eń tartymdy degen ýchaskeler naqty adamdarǵa beriledi. Basqa kásipkerler ony alý múmkindiginen qaǵylyp keledi», - dedi.
Onyń sózine qaraǵanda, elimiz boiynsha prokýrorlyq tekserýler kezinde konkýrstardy ainalyp ótip, tártipti buzý arqyly jerdi bólýdiń 4 myńǵa jýyq jaǵdaiy anyqtalǵan.
«Máselen, Kókshetaýda qadaǵalaý aktileri boiynsha 26 kommertsiialyq ýchaske memleketke qaitaryldy, bul jer telimderi erterekte aýktsionnan tys berilgen. Sonymen qatar, osy ýchaskeler belgilengen maqsatpen paidalanylmaǵan. Qazirgi kezde olardy qyzmetine adal qaraityn kásipkerlerdiń alýy múmkindigi bar», - dedi ol.
