Áýesqoilar arasynda bokstan álem chempiony atanǵan 22 jastaǵy Bekzat Nurdáýletovke Toyota Camry XV70 kóligi syiǵa tartyldy, dep habarlaidy "Ult aqparat".
Jańaózen qalasy ákimdiginiń baspasóz qyzmeti taratqan málimetke sáikes, kólikti sportshyǵa qalalyq ákimdik pen "Ózenmunaigaz" AQ syilaǵan.
"Jańaózen qalasynyń ákimi Maqsat Ibaǵarov chempiondy quttyqtap, ata-anasyna alǵysyn bildirdi. Qala ákimi sportshynyń bapkerlerin atap ótip, olar álem birinshiliginde Bekzat Nurdáýletovtyń jeńiske jetýiniń basty sebepker bolǵanyn atap ótti", - delingen habarlamada.
Sonymen qatar merekelik sharaǵa qatysqan qalalyq máslihat hatshysy Saqi Myńbai men "Ózenmunaigaz" AQ transport jónindegi basqarýshy direktory Aitqali Báshenov boksshyǵa sáttilik tiledi.
Ashyq derekkózdegi málimetterge súiensek, Toyota Camry XV70 avtokóliginiń avtosalondaǵy baǵasy – 10-17 million teńge aralyǵynda.
Osyǵan deiin Mańǵystaý oblysynyń ákimi Serikbai Turymov Bekzat Nurdáýletovke eki bólmeli páterdiń kiltin syiǵa tartqan bolatyn.
Aita keteiik, Reseidiń Ekaterinbýrg qalasynda ótken bokstan álem chempionatynda 81 keli salmaqta judyryqtasqan Bekzat Nurdáýletov tórt dúrkin álem chempiony jáne Olimpiada jeńimpazy kýbalyq Hýlio La Krýsty tize búktirdi. Al finalda ol ózbek boksshysy Dilshodbek Rýzmetovti aiqyn basymdyqpen utyp, álem chempiony atandy.
