Almaty ákimdigi Astana kúnine josparlanǵan 63 million teńgeniń jaryq shoýyna qatysty pikir bildirdi, - dep habarlaidy "Ult aqparat" Almaty qalasy mádeniet basqarmasy baspasóz qyzmetine silteme jasap.
Áleýmettik jelilerde Almatyda elorda kúnine orai biyl jazda 63 million teńgeniń jaryq shoýy ótkeni týraly aqparat paida boldy.
Alaida oqyrmandar bul jaryq shoýy shyn máninde bolmaǵany, tek montaj arqyly jasai salǵan degen kúmánin aitqan.
"Nur Light 3D show" jaryq shoýy - bul 3D mapping salasyndaǵy jetistikterdi paidalana otyryp ázirlengen joǵary tehnologiialyq kórinis. Joba Almaty qalasynyń kreativ indýstriialaryn damytý aiasynda júzege asyryldy", - delingen habarlamada.
Bul joba 6 shildede Astana kúnine josparlanǵan eken, odan keiin bul materialdy QR Táýelsizdik kúnine paidalaný josparlanypty. Alaida ótpei qalǵan.
"Ókinishke qarai, eldegi jáne qaladaǵy epidemiologiialyq jaǵdaiǵa bailanysty ol ótpeitin boldy. 2020 jyldyń 6 shildesinde jelige áleýmettik jeliler úshin arnaiy qurastyrylǵan 3D mapping elementteri bar grafikalyq rolik ornalastyryldy. Kóp jumys júrgizilgendikten, barlyq material 2021 jyly jappai is-sharalarǵa ruqsat etilgennen keiin paidalanylatyn bolady", - deidi ákimdik ókilderi.
Jobany "VARDI Aziia" JShS ivent-kompaniiasy júzege asyrǵany da aitylady.
"Barlyq jumys oryndalǵandyqtan, túsirilim 2020 jylǵy 25 maýsymda QBTÝ ǵimaratynda túngi ýaqytta júrgizildi, aýdiovizýaldy kontenti bar barlyq material jáne Mádeniet basqarmasyna shyǵarmashylyq esepter tapsyryldy, tólem júrgizildi", - delingen habarlamada.
