Birde-bir ákim saýda nysandaryna zańmen belgilengen yqpal etý sharalaryn qabyldamaǵan. Bul týraly búgin Úkimet otyrysynda QR Saýda jáne integratsiia ministri Baqyt Sultanov aitty, dep habarlaidy "Ult aqparat".
«2019 jyly áleýmettik mańyzy bar azyq-túlik taýarlaryna baǵanyń ósýi 10,4 paiyzdy qurady. Biylǵy jyldyń qańtar aiynda biz maýsymdyq baǵanyń 0,3% paiyzǵa óskenin baiqaimyz. Bul rette, ol ótken jylǵy qańtarǵa qaraǵanda eki ese tómen jáne aldyńǵy jyldardyń alǵashqy ailaryndaǵy baǵanyń ósýimen salystyrmaly. Atalǵan ósimderdiń sebepterin aitatyn bolsaq. Astyq túsiminiń tómendeýine jáne eksporttyń ulǵaiýyna bailanysty obektivti faktorlardy esepke almaǵanda, olar baǵa monitoringi jáne jedel sharalar qabyldaý boiynsha ákimdikterdiń jetkiliksiz belsendiligin kórsetedi», - dedi ol.
Ministrdiń aitýynsha, ótken jyly barlyq óńirlerde shekti baǵadan asqan 67 jaǵdai tirkeldi. Biraq, birde-bir ákimdik ruqsat etilgen shekti baǵany bekitý rásimderin qoldanbaǵan jáne saýda nysandaryna zańmen belgilengen yqpal etý sharalaryn qabyldamaǵan. Qańtar aiynda shekti baǵadan asyp túsken qaitadan 7 jaǵdai tirkeldi. Alaida ákimdikter tarapynan taǵy da eshqandai is-qimyl bolǵan joq.
«Mysaly, Qostanai oblysynda jalpy áleýmettik mańyzy bar taýarlar baǵalarynyń 0,7 paiyzǵa tómendeýine qaramastan, taýyq eti jáne jumyrtqa boiynsha baǵanyń bekitilgen sheginen artqany baiqalady», - dedi Baqyt Sultanov.
