Ákimderdiń aýyl sharýashylyǵynyń jai-kúiine qatysty aqparattyń durystyǵyn qamtamasyz etý jónindegi jaýapkershiligin arttyrý kerek. Bul týraly Senat depýtaty Aqylbek Kúrishbaev aitty, dep habarlaidy QazAqparat.
«Birinshi - azyq-túlik infliatsiiasy boiynsha. Biyl aýyl sharýashylyǵy úshin óte qolaisyz jyl boldy. Mundai jappai qurǵaqshylyq bizde 30 jyldan astam ýaqyt bolmaǵan. Sondyqtan qazir azyq-túlik taýarlarynyń naqty teńgerimin baqylap otyrý óte mańyzdy. Al ol úshin biz aýyl sharýashylyǵy ónimderi óndirisiniń naqty kólemin bilýge tiispiz. Ókinishke orai, aýyl sharýashylyǵy ónimderi týraly statistikalyq derekterde úilespeitin, bir birinen alshaq aqparattar bar. Qazir aýyl sharýashylyǵy óndirisiniń kólemi týraly esepti tek zańdy tulǵalar ǵana tapsyrady. Al sharýa/fermer qojalyqtarynan jáne jeke qosalqy sharýashylyqtardan bul derekterdi interviýerler iriktemeli ádispen jinaidy. Sharýa qojalyqtarynyń tek 30 paiyzy jáne qosalqy sharýashylyqtarynyń bar bolǵany 2,5 paiyz ǵana esep beredi. Iaǵni olardyń 97,5 paiyzy eshqandai esep bermeidi. Basqasha aitqanda, aýyl sharýashylyǵyndaǵy óndiris kóleminiń edáýir úlesi ákimder jinaityn ákimshilik aqparatqa negizdelip aiqyndalady», - dedi ol Senattyń jalpy otyrysynda.
Osy rette senator ákimderdiń aýyl sharýashylyǵynyń jai-kúii boiynsha jinaǵan aqparatynyń durystyǵyn qamtamasyz etý jónindegi jaýapkershiligin arttyrý qajettigin basa aitty.
«Statistika basshylarynyń ózderi atap ótkendei, jergilikti atqarýshy organdar óz reitingilerin kóterý maqsatynda egin ónimdiligi boiynsha joǵary kórsetkishterge múddeligi statistika derekterin burmalaýyna ákelý qaýpi bar. Al burmalanǵan aqparattar «qisyq aina» áserin týdyryp memlekettik organdarynyń mańyzdy sheshimder qabyldaýyna, sonyń ishinde azyq-túlik balansyn retteý jumystaryna negiz bolýy múmkin», - dedi Aqylbek Kúrishbaev.
