Foto: primeminister.kz
Túrkistan oblysynyń ákimi Darhan Satybaldy Ortalyq kommýnikatsiialar qyzmetinde ótken brifingide túrik aspazy Býrak Ózdemirge nege shapan japqanyn túsindirdi, dep habarlaidy Kazinform.
«Túrkistanǵa kelgen belgili aspaz Býrak Ózdemirge shapan japqan edińiz. Ol Túrkistanda meiramhana ashatynyn aityp ketti. Sol usynys ne bolyp jatyr? Túrik kásipkerine kórsetkendei qurmetti ózimizdiń kásipkerlerge kórsetip júrsiz be?», - dep surady jýrnalist.
Oblys ákimi áigili aspazdy Ózbekstanda júrgen jerinen aldyrǵanyn aitty.
«Ony biz Tashkentte júrgennen keiin beri qarai shaqyrdyq. Shaqyrǵannan keiin kelip, Túrkistandy kórip, ózi tańǵalyp ketip otyr. Onyń málimeti boiynsha Túrkistanǵa kelgennen keiin myńdaǵan adam jazypty. Oqyrmanynyń sany 70 milliondai eken. «Osylardyń bári kórip otyr», - dep, meiramhana ashý týraly usynys jasady. Biraq ol ózi ashpaidy. Franshizasyn beredi, sondai ýáde berdi. Sol franshiza boiynsha meiramhana salatyn kásipkerler bolsa, qoldaýǵa daiynbyz. Al shapandy Túrkistanǵa kelgen soń japtyq», - dedi ol.
Ákimniń sózinshe, osy sapardan keiin Túrkiia jastarynyń nazary Túrkistanǵa aýǵan.
«Túrik memleketindegi jastar da ol arqyly Túrkistandy tanyp, ol arqyly keseneni, Kerýen saraidy kórip jatyr. Túrki memleketteriniń rýhani astanasy bar ekenin bilip jatyr. Osyndai tanymal azamattardy biz árqashan shaqyramyz. Shapan jabýǵa daiynbyz. Eshqandai problema joq.
Al qazaqstandyq kásipkerlerdi men shaqyrmaimyn. Olardyń aldyna men ózim baram. Ár aýdan biledi. Shaǵyn tseh ashsa da, ózim baryp tikelei suhbattasamyn, qandai kómek kerek ekenin suraimyn», - dedi Darhan Satybaldy.
