Keshegi ótken ákimder sailaýynda ózin-ózi usynǵan 100-den astam úmitker jeńiske jetken. Bul týraly Ulttyq qoǵamdyq senim keńesiniń múshesi Talǵat Qaliev aitty, dep habarlaidy QazAqparat.
Ulttyq qoǵamdyq senim keńesiniń múshesi saiasi partiialarǵa keshegi sailaýǵa budan da belsendirek qatysýy kerek bolǵanyn aitady.
«Saiasi partiialardyń bul protseske qatysýy ákimderge qosymsha resýrstarǵa qol jetkizýge múmkindik berer edi. Partiianyń saiasi, ákimshilik, tipti kei jerde media kómegin qosymsha resýrs retinde paidalana alýshy edi. Iaǵni, ákim óz okrýginde jalǵyz bolmai, partiialar janyndaǵy taldaý ortalyqtarynyń intelektýaldyq qýatyn paidalanyp, aýylda biznesti damytyp, túrli máselelerdi sheshýdiń jan-jaqty joldaryn kórsete alatyn. Biraq «Aýyl» jáne «Nur Otan» partiialarynan basqasy osy múmkindikti jiberip aldy deýge bolady. Meniń túsinýimshe basqa partiialar asa bir belsendi qatysqan joq», - deidi sarapshy.
Ulttyq keńes múshesi ákim sailaýynyń qorytyndylaryn burmalaǵysy keletinder bolsa da, bul óte qiynǵa túsetinin aitady.
«Sońǵy aqparattar boiynsha ózin-ózi usynǵan 100-den astam úmitker ákim bolǵan. Jalpy kandidattardyń 3/2-si ózin-ózi usynǵanyn bilesizder. Bul óte jaqsy kórsetkish. Bir jaǵynan, adamdar reformaǵa sengendikten belsendi atsalysyp otyr. Bir orynǵa shamamen 3 úmitkerden túsken. Ekinshi jaǵynan, qatysý deńgeiiniń joǵary bolýy halyqtyń daýys berý arqyly óz ómirlerin ózgertýge bolatynyna senetinin kórsetti. Iaǵni bul demokratiianyń jaqsy mektebi. Bul eldi mekenderde sailaý qorytyndysyn burmalaýdyń ózi óte qiyn bolar edi. Óitkeni bári bir-birin jaqsy tanidy. Tipti keibir shaǵyn okrýgterde halyq aýla-aýlaǵa kirip, kimniń kimge daýys bergenin Exit poll ótkizbei-aq anyqtaýǵa bolady. Sáikesinshe sailaý aitarlyqtai ádil, ashyq ótken protsess boldy», - deidi Talǵat Qaliev.
Onyń atýynsha, bul sailaýdyń basty ereksheligi halyq sailanǵan ákimniń jumysynan naqty nátijeni óte jyldam kóre alatynynda.
«Mysaly, Májilis depýtatyn sailaǵan kezde onyń bergen ýádesi zańǵa ainalyp, ol zań ómirge enip, ózgeris ákelgenshe biraz ýaqyt ótedi. Sondyqtan ol sailaýdyń nátijesi men ózgeristerdiń bailanysyn qarapaiym halyqtyń kórýi óte qiyn. Al ákimdi sailaǵan kezde nátijesi birden kórinedi. Mysaly sailanǵan ákim eki aidyń ishinde aýylǵa sý tartqyzýy múmkin degen siiaqty. Al jarty jyldan keiin jol nemese mektep jóndele bastaýy múmkin», - degen sarapshy aýyl halqynyń saiasi naýqandy aitarlyqtyń yń-shyńsyz ótkizýi ondaǵy halyqtyń aýyzbirligi myqty bolǵanymen bailanystyrdy.
«Bálkim bul bizdiń mádeni ereksheligimiz shyǵar. Sailaý janjalsyz, aýyldaǵy halyq ózara aqyldasa otyryp sheshkendei áser qaldyrdy. Qazaqtyń boiynda kezinde osyndai erekshelik bolǵan. Bálkim sol qasiet qaita oianyp jatqan shyǵar», - dedi Talǵat Qaliev.
