Qaraǵandyda aýdan ákimderiniń biriniń orynbasaryn aldap, aqsha iemdendi dep aiyptalǵan eki adamǵa qatysty sot úkimi shyqty. Olardyń biri boiynsha is jábirlenýshimen tatýlasýyna bailanysty toqtatylsa, ekinshi epizod boiynsha sottalýshylar raqymshylyqqa iligip, jazadan bosatyldy, dep habarlaidy ult.kz.
Qazybek bi aýdandyq sotynyń málimetinshe, oqiǵa 2025 jyldyń jeltoqsanynda bolǵan. Aiyptalýshylar ózderin aqparattyq portaldyń qyzmetkerleri retinde tanystyryp, aýdan ákimdigi týraly jaǵymsyz beinerolik jariialanatynyn aityp qorqytqan. Olar videony taratpaý úshin aýdan ákimi orynbasarynan aqsha talap etken.
Sheneýnik olardyń sózine senip, 2,5 million teńge kóleminde nesie rásimdep, aqshany bergen.
Bir aidan keiin kúdiktiler dál osyndai tásilmen taǵy aqsha almaq bolǵan. Alaida bul joly olardy politsiia qyzmetkerleri ustaǵan.
Sot barysynda aiyptalýshylar kinálaryn moiyndady. Olardyń áreketi jábirlenýshi men kýágerlerdiń jaýaptarymen, sondai-aq is materialdaryndaǵy dáleldermen rastalǵan.
Prokýratýra birinshi epizod boiynsha taraptardyń tatýlasýyna bailanysty isti toqtatýdy surady. Sebebi keltirilgen shyǵyn tolyq ótelip, jábirlenýshi aiyptalýshylardy keshirgen.
Al ekinshi epizod boiynsha sot «birneshe ret jasalǵan» degen saralaý belgisin alyp tastap, aiypty jeńil bapqa qaita saralady. Sonyń nátijesinde «Qazaqstan Respýblikasynyń jańa Konstitýtsiiasynyń qabyldanýyna bailanysty raqymshylyq jasaý týraly» zań negizinde eki sottalýshy da jazadan bosatyldy.
Úkim ázirge zańdy kúshine engen joq.
