Qostanai oblysy Jangeldi aýdanynyń turǵyndary Ahmet Baitursynuly dúniege kelgen úidi qalpyna keltirdi. Biyl ult kóseminiń úiinde aýqymdy jóndeý jumystary jalǵasatyn bolady, dep habarlaidy "Ult aqparat" alau.kz-ke silteme jasap.
A. Baitursynuly aýylynyń janynda kóne qorym bar. Sazdan soǵylǵan qorshaýlar ábden úgitilip bitken. A. Baitursynulynyń týystary jerlengen bir ǵasyr burynǵy zirattar da birte-birte jemirilýde. Moladan bir shaqyrymdai jerde, Aqkól jáne A. Baitursynuly aýyldarynyń arasynda kishigirim úi bar. Kónekóz qarttardyń aitýynsha, sol jerde 1872 jylǵy 5 qyrkúiekte «Alash» partiiasynyń ókili, qazaqtyń uly ǵalymy ári aǵartýshy Ahmet Baitursynuly dúniege kelgen.
Ol kezderi munda Sarytúbek aýyly otyrǵan.
«Ata-babalarymyzdyń aitýynsha, Ahmet Baitursynuly týǵan úi qaz-qalpynda saqtalǵan. Keńestik kezeńde osynda qonystanǵan keńshardyń baqtashylary da ony barynsha saqtaǵan. Biraq keiin úi buzylyp ketti. Eki aýyldyń jastary úidi baiaǵy pishini boiynsha qalpyna keltirdi», - dep habarlaidy Aqkól aýylynyń ákimi Balǵabai Qaliev.
Úidi saqtalyp qalǵan irgetasynyń arqasynda qalpyna keltirý múmkin boldy. Munda bar bolǵany eki bólme bar, olarǵa ortaq bir pesh salynǵan. Endi úide kishigirim mýzei de bar. Mýzeidi negizinen mektep oqýshylary kelip tamashalaidy.
Biyl úidi kúrdeli jóndeý týraly sheshim qabyldanyp, oǵan 11 mln teńge mólsherinde qarajat bólindi.
