«Astana» halyqaralyq qarjy ortalyǵynda (AHQO) 5-9 qazan aralyǵynda virtýaldy 2020 Halyqaralyq investorlar aptalyǵy ótedi, dep habarlaidy QazAqparat.
Aptalyqqa tutynýshylar men iskerlik orta tarapynan óte joǵary qyzyǵýshylyq tanytylýdy.
Halyqaralyq investorlar aptalyǵy jyl saiyn álemniń 6 kontinentindegi 80 eldiń qarjylyq retteýshilerimen Halyqaralyq baǵaly qaǵazdar komissiialary uiymynyń (IOSCO) qoldaýymen ótkiziledi. IOSCO – bul qor naryǵyn retteýshilerdiń halyqaralyq uiymy. IOSCO músheleri álemniń 115-ten asa iýrisdiktsiiasynda baǵaly qaǵazdar naryǵynyń 95%-nan astamyn retteidi. Halyqaralyq investorlar aptalyǵyn ótkizý AHQO-niń qarjylyq qyzmetterdi tutynýshylardy qorǵaý boiynsha IOSCO standarttaryna adaldyǵyn kórsetedi.
«Halyqaralyq investorlar aptalyǵy is-sharasyn búkil álem boiynsha retteýshiler tórtinshi jyl qatarynan ótkizip keledi. Biz AHQO-da úshinshi jyl ótkizgeli otyrmyz. AHQO Qarjylyq qyzmetterdi retteý jónindegi komiteti úshin investorlar men qarjylyq qyzmetterdi tutynýshylardyń quqyqtaryn qorǵaý birinshi kezektegi másele bolyp tabylady. Biz investorlar uzaq merzimdi josparda qarjylyq turaqtylyqqa qol jetkizýdiń qosymsha quraldarynyń biri retinde baǵaly qaǵazdar naryǵy beretin táýekelder men múmkindikter týraly kóbirek bilýine umtylamyz. Qazirdiń ózinde biz tutynýshylar men biznes-qoǵamdastyqtyń AHQO usynatyn múmkindikterine, qandai qundy qaǵazdardy ornalastyrýǵa nemese investitsiialaýǵa bolatyndyǵyna, investorlar men emitentterdiń múddeleri qalai qorǵalatynyna qyzyǵýshylyq tanytyp otyrǵanyn baiqap otyrmyz», - dedi AHQO Qarjylyq qyzmetterdi retteý jónindegi komiteti (AFSA) bas direktorynyń mindetin atqarýshy Muhtar Bóbeev.
Sonymen, 5 qazanda bastalatyn aptalyqtyń ashylýynda AFSA bas direktorynyń mindetin atqarýshy Muhtar Bóbeev pen IOSCO bólshek investorlar komitetiniń tóraǵasy – Baǵaly qaǵazdar jáne birjalar jónindegi komissiiasynyń investorlardy qorǵaý departamentiniń direktory (Braziliia) Hose Aleksandr Vasko kirispe sóz sóileidi. Osy kúni AHQO-daǵy investorlardy qorǵaý, tutynýshylardyń quqyqtaryn qorǵaý taqyryptarynda baiandama jasalady. Tústen keiin AHQO-da qarjylyq qyzmetter jáne investitsiialyq múmkindikter týraly dáris oqylady.
6 qazan kúni ótetin Bólshek investorlar kúninde Astana halyqaralyq birjasynyń (AIX) bólshek investorlarǵa arnalǵan investitsiialyq múmkindikter i tanystyrylady.
Al 7 qazanda AHQO-daǵy kapital naryqtarynyń qarjy quraldary tanystyrylymyn ótkizý kózdelgen. Osy kúni tústen keiin «Qazaqstandaǵy halal investitsiialar» paneldik sessiiasy men « AHQO-daǵy qaryz kapitaly naryǵy - baqylaý paraǵy» taqyrybynda AHQO Zań akademiiasynyń vebinary ótkiziledi.
AIX-tiń normativtik qurylymy jáne ony qadaǵalaý taqyryby 8 qazanda talqylanady. Odan basqa «FinTech: balama investitsiialar» taqyryby qarastyrylyp, «Otbasylyq qarjy» paneldik sessiiasyn ótkizý josparlanǵan.
9 qazanda Investorlar kúnine arnalǵan konferentsiia, «Sandyq qarjylyq qyzmet aiasynda AHQO-daǵy investorlardy qorǵaý» sessiiasy, «Qazirgi álemdegi qorlardy retteý» taqyrybyndaǵy vebinar bolady.
Qarjylyq qyzmetterdi tutynýshylardy qorǵaýdy jáne investitsiialaý negizderi týraly habardar etýdi maqsat tutqan sharanyń negizgi uiymdastyrýshysy AFSA AHQO-nyń ákimshiligi, AIX, Biliktilikti arttyrý biýrosy jáne AHQO-nyń Finteh habymen birlesip ótkizedi.
AHQO-nyń qarjylyq qyzmetter kórsetýdi retteý jónindegi komiteti (AFSA) AHQO-da qarjylyq qyzmetterdi jáne onymen bailanysty qyzmetti retteý maqsatynda «Astana» halyqaralyq qarjy ortalyǵy týraly» Qazaqstan Respýblikasynyń Konstitýtsiialyq zańyna sáikes qurylǵan AHQO-nyń táýelsiz retteýshisi bolyp tabylady.
