Parlament Májilisiniń depýtaty Berik Dúisenbinov Indýstriia jáne infraqurylymdyq damý ministri Beibit Atamqulov pen Energetika ministri Nurlan Noǵaevqa saýal joldady.
«Búgin as-sýyn aǵash jaǵyp ázirlep, úiin kómirmen jylytyp otyrǵandar bar. Ótken aptada «Aq jol» fraktsiiasy depýtattarynyń Túrkistan oblysynyń turǵyndarymen kezdesý barysynda bul máseleniń áli de tolyǵymen sheshimi tabylmai otyrǵandyǵynan habardar boldyq. Aýyl azamattary gazben qamtý máselesin taǵy da kóterip, ákimderdiń ásem esepteriniń shyndyqtan alys ekenin jarysa aityp, janaiqaiyn jetkizdi. Rýhani astanamyz - Túrkistan qalasy búginde ózgerip, qala kelbeti oblys ortalyǵynyń mártebesine laiyq, gúldenip kele jatqandyǵyn kórip otyrmyz. Degenmen, qazaqtyń qara shańyraǵy – ońtústik aimaq, infraqurylymdyq damý, sapaly ómir súrý turǵysynan tek Túrkistan qalasymen ǵana shektelip qalmaýy kerek dep esepteimiz», - dedi Berik Dúisenbinov saýalynda.
Onyń aitýynsha, Qazaqstan álemdegi 30 damyǵan memlekettiń qataryna kiremiz dep biik maqsat qoiǵan el. Biraq jylyna 50 mlrd sharshy metr gaz óndiretin Qazaqstannyń halqy sol gazben úiin jylyta almasa «biz qandai ómir sapasy týraly aita alamyz, ondai álemdik reitingtiń quny bes tiyn»,- deidi ol.
«Mysaly Túrkistan oblysy Keles aýdany «Birtilek» aýyly, «Eńbekshi» jáne «Oraz ata» eldi mekenderi turǵyndarynyń aitýynsha, osydan 4 jyl buryn atalmysh aýyldarǵa gaz qubyry salynyp, turǵyndar óz qarjylaryna úilerine qubyr tartyp, gaz peshterine deiin qoiyp alǵan. Osyndai jaǵdai Jetisai aýdanynyń Kóktóbe aýylynda, Sairam aýdanynyń jeti aýylynda, Ordabasy, Qazyǵurt aýdany aýyldarynda oryn alǵan. Ókinishke qarai búgingi kúnge deiin osy aýyldarǵa kógildir otyn áli jetpegen. Eger gaz bolmasa, turǵyndardan nege 4 jyl buryn qarjy jinalǵan?» - deidi ol.
Depýtat turǵyndarmen kezdesý kezindegi shaǵymdarǵa súiene kele, Jetisai aýdanyndaǵy 72 mekteptiń 39 áli de kómir qyzýymen jylynatynyn jetkizdi.
«Gazdyń qosylmaý sebebin jergilikti ákimshilikte, ókiletti organdar ártúrli tehnikalyq sebeptermen túsindirýde. Biraq, mardymdy,naqty jaýap ala almadyq. Árine, syltaýdyń túri kóp, qaǵaz bárin kóteredi. Osy aýyl azamattary men mektepterge gazdyń jetpeýine sebep bolyp otyrǵan sheneýnikter men gaz qubyrynyń basynda otyrǵan ókiletti organnyń basshylaryna kógildir otynsyz otyrǵan aýyldarǵa kóship, balalaryn sýyq mektepte oqytyp, kele jatqan qystyń qarsańynda tezekpen jylynyp ómir súrýge keńes beremiz. Sonda múmkin, bul másele jyldam sheshiler. Joǵaryda aitylǵandardy eskere otyryp, «Aq jol» fraktsiiasy Túrkistan oblysyndaǵy atalǵan aýyldar men mektepterge búgingi kúnge deiin gaz kelmeý sebebi, oǵan jaýapty laýazymdy, zańdy tulǵalardy anyqtap, olardyń qandai jaýapkershilikke tartylǵandyǵy jóninde jáne bul másele óz sheshimin qashan tabatyny týraly aqparat suraidy», - dedi ol.
