Pavlodardaǵy joǵary elektronika jáne kólik kolledjiniń ustazdary Grammy júldesiniń iegeri Imanbek Zeikenov týraly pikirimen bólisti, dep habarlaidy Pavlodarnews.kz.
Imanbek - Pavlodardaǵy joǵary elektronika jáne kólik kolledjinde bilim alǵan.
Atalǵan bilim ornynyń arnaiy pánder oqytýshysy Maqpal Jitebaevanyń aitýynsha, Imanbek únemi belsendiligimen tanylyp, mýzykaǵa degen qushtarlyǵyn kórsetip júretin.
"Kolledjdegi kontsertterde didjei bolatyn. Bastysy sabaǵyn óte jaqsy oqydy. Men onyń barlyq kýrstyq jumystary men diplomdyq jumystaryna jetekshilik jasaǵam. Ol bárin "beske" tapsyryp júrdi. Ol syzýdan bolsyn, matematikadan bolsyn barlyq taqyryptardy tez igerip alatyn", - deidi ol.
Grammy iegeriniń taǵy bir ustazy Renat Ysqaqov Imanbektiń jumysqa ikemdiligi men eńbekqorlyǵyn erekshe atap ótti.
"Onyń qazirgi jastar siiaqty aq saýsaq emes ekeni, eńbekqor, barlyǵyn óz qolymen jasaýǵa tyrysý degen yntasy baiqalatyn. Kolledjdiń kez kelgen is-sharasy Imanbektiń kómeginsiz ótpeitin. Tórtinshi kýrstan bastap ol mýzykaǵa den qoia bastady, kýrstastarymen jańalyqtarymen bólisip júrdi", - deidi Renat Ysqaqov.
