QR Aqparat jáne qoǵamdyq damý ministri Aida Balaeva jýrnalisterdiń mártebesi týraly zań jobasy qashan talqylaýǵa shyǵarylatynyn aitty, habarlaidy QazAqparat.
«Jýrnalisterdiń quqyǵy men áleýmettik mártebesi týraly zań jobasyn ázirleý máselesi qarastyrylyp jatyr. Nurtóre Júsip myrza jýrnalisterge úi alý nemese basqa jaǵdailarda jeńildik jasaý týraly aityp otyr ǵoi. Bul jumys barlyq memlekettik mekememen kelise otyryp iske asatyn dúnie ekeni belgili. Ol kisi ministrlikpen qoian-qoltyq jumys istep otyr. Al zań jobasynyń mátinin úkimettik emes uiymdarmen, sarapshylarmen keńesip jazamyz. Qujat jobasyn keler jyldyń alǵashqy jartyjyldyǵynda ashyq talqylaýǵa shyǵaramyz dep oilap otyrmyz», – dedi ministr qazaq tilinde kontent jasaýshylar forýmynda tilshilerge bergen suhbatynda.
Atalmysh sharada vedomstvo basshysy otandyq telearnalar men baǵdarlamalardyń reitingileri live-rejimge shyǵarylatynyn atady.
«Buǵan deiin qoǵam tarapynan media ólsheý júiesin jetildirý týraly usynystar aitylǵan bolatyn. Osy oraida, biz osy aidan bastap ministrliktiń saitynda zamanaýi IP tehnologiialardy paidalana otyryp, jańa júieni iske qostyq. Onyń negizinde, qyzyǵýshylyq tanytqan kez kelgen azamat barlyq qazaqstandyq telearnalar men baǵdarlamalardyń reitingilerin live-rejimde kóre alady. Qazir otandyq kontentti qaraýshylar úlesi úlken qarqynmen ósip keledi. Búginde Qazaqstan media naryǵyndaǵy shet eldik jáne otandyq arnalar reitingisinde úzdik TOP-10-dyqty bizdiń otandyq telearnalar ielendi. Munyń ózi bizdiń ulttyq teleónimderdiń básekege qabiletiniń jyldan-jylǵa artyp kele jatqanyn kórsetedi», - dedi ministr.
