QR Aqparat jáne qoǵamdyq damý ministri Aida Balaeva koronavirýs vaktsinasyn saldyrdy. Bul jaiynda ol «Balaevaǵa 3 suraq» baǵdarlamasynda aitty, dep habarlaidy "Ult aqparat".
«Qazir kóńil-kúiim kóterińki, jaqsy. Densaýlyǵyma eshqandai áserin tigizgen joq. Ineni salǵan kezde aýyratyny bar, sál aýyrsyný boldy. Meditsina qyzmetkerlerinen jalpy nusqaýlyq surap aldym. 2-3 kún densaýlyǵymdy kútip, sýyqqa shyqpai, maska kiip júrý syndy saqtyq sharalaryn oryndaityn bolamyn. Endi 21 kúnnen keiin ekinshi komponentin alamyn», - dedi ministr.
Sonymen qatar ol «Spýtnik V» vaktsinasyn alǵanyn atap ótti.
«Qazaqstandyq vaktsina synaqtyń úshinshi satysynan ótip jatqany belgili. Ony kútpeý úshin búgin reseilik Spýtnik V vaktsinasyn saldyrdym», - dedi Aida Balaeva.
Aqparat ministriniń atap ótýinshe, ár adam óziniń azamattyq jaýapkershiligin sezine bilýi kerek. Óitkeni, bul onyń ǵana densaýlyǵynyń emes búkil qoǵamnyń qaýipsizdigi.
«Tarihi tájiribe kórsetip otyrǵandai, vaktsinatsiia - virýsty jeńýdiń jalǵyz joly. Vaktsina saldyrǵannan keiin de qaýipsizdik is-sharalaryn eshkim de ózgertip jibermegeni túsinikti. Qalypty ómirge oralýymyz, balalarymyzdy mektepke jibere alýymyz, jaqyndarymyzben kezdesip, otbasylyq, sonymen qatar memlekettik deńgeidegi is-sharalardy ótkizýimiz úshin ujymdyq immýniettiń qalyptasýy óte mańyzdy», - dedi ol.
