Aqparat jáne qoǵamdyq damý ministri Aida Balaeva byltyr qurylǵan Ulttyq qoǵamdyq senim keńesiniń bir jyldan astam ýaqyttyń ishindegi jumysyn qorytyndylady.
QR Prezidenti Teleradiokesheniniń YouTube arnasyndaǵy «Balaevaǵa 3 suraq» baǵdarlamasynyń 6-shyǵarylymynda ministr Ulttyq keńestiń basty eńbegi, jospary men keleshegi týraly oiymen bólisti, dep habarlaidy "Ult aqparat".
Ministr Ulttyq qoǵamdyq senim keńesi qurylǵannan beri bir jyldan endi asqanyn eske saldy. Osy ýaqyt ishinde qoǵamdy eleń etkizgen birshama sharýa atqarylylǵan. Eń negizgi nátije retinde – saiasi reformalar toptamasyn aitýǵa bolady.
Atap aitqanda «Beibit jinalystardy uiymdastyrý jáne ótkizý tártibi týraly» jańa zań qabyldanyp, «Saiasi partiialar týraly», «Sailaý týraly», «Parlament jáne onyń depýtattarynyń mártebesi týraly» zańdarǵa ózgerister engizilgen. Qylmystyq kodekstiń 130-baby qylmys sanatynan alynyp tastalyp, Ákimshilik kodekske aýystyrylǵan. 174- baptaǵy bas bostandyǵyna aiyrý jazasy – aiyppul salýmen almastyrylǵan. «Ardagerler týraly» jańa zań qabyldanyp, syrtqy qaryz biryńǵai reestri bekitildi. Sheteldik jumys kúshine kvota eki esege qysqardy. Aýyl sharýashylyq jerlerin tiimdi paidalaný boiynsha kosmostan monitoring jobasy júzege asyp, memleket menshigine 7 mln ga paidalanylmaityn jaiylym qaitaryldy.
«Ulttyq qoǵamdyq senim keńesi bizdiń qoǵamda oi erkindigi men pikir alýandyǵyna shekteý joq ekenin kórsetti. Árine, keńes óz jumysyn «Halyq únine qulaq asatyn memleket» qaǵidasymen alda jalǵastyra beretin bolady. Ýaqyt talabyna sai, onda kóteriletin máseleler, usynystar únemi jańaryp, jańǵyryp otyrady. Mysaly, jaqynda Ulttyq keńes músheleriniń usynysymen mádeni-rýhani máselelerdi damytý baǵytynda jańadan top qurylatyn bolady. Iaǵni, Keńes jumysy, tek belgili salalarda ǵana shektelip qalmaidy. Ol qoǵamnyń barlyq salasyndaǵy kókeitesti máselelermen ainalysady», - deidi Aida Balaeva baǵdarlama barysynda.
