Búgingi kúni halyqpen belsendi keri bailanysty jolǵa qoiyp, olardy tyńdaý, suranystaryna jaýap berý óte mańyzdy. Bul týraly búgin Zoom tuǵyrnamasynda prezidenttik kadrlyq rezervke kirgen jastarmen onlain rejimde kezdesken QR Aqparat jáne qoǵamdyq damý ministri Aida Balaeva aitty, dep habarlaidy "Ult aqparat".
«Mańyzdy salalardyń biri - jastar saiasaty. Biz ádisterin ózgerttik. Olar jastardyń jas erekshelikterine bailanysty qyzyǵýshylyqtaryna jáne áleýmettik sanatyn orai saralanady. Áleýmettendirilgen toptyń bar ekendigi túsinikti. Biraq, Biz qamtymaǵan jastar da bar. Olarmen ózara is-qimyldy qalai jolǵa qoiý kerek, qandai jobalardy júzege asyrǵan jón degen máselelermen jumys isteý qajet. Osy oraida jastardyń belgili bir sanatyna qyzyqty jobalar usynǵandaryńyzdy qalaimyz», - dedi ministr prezidenttik kadrlyq rezervke kirgen jastarǵa.
Onyń atap ótýinshe, otbasylyq saiasat salasynda otbasylyq qundylyqtardy nasihattaý qajet. Ulttyq kodty saqtap qalý da mańyzdy máselelerdiń biri. Óitkeni, qazirgi jahandaný dáýirinde ulttyq tilden, mádenietten, salt-dástúrden aiyryp qalý op-ońai.
«Munyń barlyǵy otbasydan bastalady. Sondyqtan osynaý otbasylyq qundylyqtardy nasihattaý mańyzdy. Ajyrasý sany artyp barady. Sebebi san alýan: minezdiń úilespeýi, turmystyq problemalar. Osy rette jas otbasylar arasyndaǵy ajyrasý paiyzyn barynsha qysqartý úshin tyǵyz ózara is-qimyl jasaýymyz mańyzdy bolyp otyr», - dedi ol.
Sonymen qatar ministr dinaralyq kelisimdi saqtaý máselesine de airyqsha toqtalyp, destrýktivti sektor tarapynan úlken syn-tegeýrin bolyp turǵandyǵyn ashyq aitty. Problema adamnyń dinshildigine emes, onyń dini saýatsyzdyǵynda ekendigin airyqsha atap ótti.
«Teologtarymyz barlyq ýaqytta belgili bir dini uiymnyń erekshelikteri daiynda qyzyqty ári jetesine jetkizip aita almaýy da múmkin. Biz bul baǵytta jańa formalar men ádister ázirleýimiz qajet. Turmystyq janjaldyń etnosaralyq alaýyzdyqqa ainalyp ketýge beiim ekendigin ózderińiz de kórip otyrsyzdar. Buǵan jol berýge bolmaidy. Óitkeni, bul óte názik sala. Elimizde oryn alǵan turaqtylyqty saqtaý jáne qarapaiym turmystyq jandaldardy etnosaralyq shieleniske órshýinejol bermeýimiz kerek. Sondyqtan ózderińizdi taǵy da belsendi yntymaqtastyqqa shaqyramyn», dedi Aida Balaeva jastarǵa qarata.
