Aqparat jáne qoǵamdyq damý ministri Aida Balaeva otandyq BAQ salasyn damytý máselelerine arnalǵan dóńgelek ústel jiynynda qazirgi ýaqytta tutas memleketterdiń qarqyndap ósýi de, quldyrap óshýi de zamanaýi aqparattyń oń-terisine bailanysty ekenin aitty, dep habarlaidy "Ult aqparat".
– Kez kelgen memleket úshin aqparat kózderine nazar salyp, tiimdi jumys jasaý – óte mańyzdy másele. Árine, bul baǵytta elimizde Táýelsizdik alǵaly beri atqarylǵan sharýa jeterlik. Oǵan osynda otyrǵan, kezinde sol úrdisterdiń basy-qasynda bolǵan aǵalarymyz da, keiingi býyn áriptesterimiz de kýá. Rasynda da, ol kezdegi media-keńistikti búgingi deńgeimen salystyrýǵa tipten kelmeidi. Eń bastysy, otandyq BAQ ýaqyt kóshinen qalmai, qarqyndy damyp keledi. Degenmen ár zamannyń óz talaby, ár kezeńniń óz mindeti bar. Búgingi tańda bul salada da sheshimin tappai otyrǵan túitkildi túiinder jeterlik.
Sondyqtan óz basym búgingi is-shara «syldyr sózge» emes, tushymdy oiǵa, paiymdy pikirge bai, utymdy usynystarǵa toq naǵyz pikirtalas alańyna ainalady dep senemin. Bul turǵyda sizderdiń belsendilikterińiz ben shynaiy janashyrlyqtaryńyz qajet, – dedi Aida Balaeva.
