Aqparat jáne qoǵamdyq damý ministri Aida Balaeva onlain-petitsiia institýtyn engizý baǵytynda qandai jumys júrgizilip jatqanyn aityp berdi, dep habarlaidy QazAqparat.
«Qazaqstanda qoǵam ókilderi onlain-petitsiia institýtyn zańnamalyq turǵyda bekitý bastamasyn buǵan deiin birneshe ret kótergen bolatyn. Elimizde ol institýt jumysyn bastaý úshin onlain-petitsiialar boiynsha platformany ázirleý kerek. Biraq eń bastysy qajetti normativti-quqyqtyq baza bolýy tiis. Osyǵan bailanysty qazirgi ýaqytta biz zańnamaǵa engiziletin túzetýler paketin ázirleýdemiz», - dedi Aida Balaeva Prezidenttik jastar kadrlyq rezervindegi azamattarmen kezdesý barysynda.
Ministrdiń aitýynsha eń aldymen petitsiia degenniń ne ekenin aldymen túsindirip alý kerek.
«Ekinshiden petitsiia jiberý, memlekettik organdardyń petitsiialardy moderatsiialaý men qaraý tártibin rettegen abzal. Úshinshiden memlekettik organdardyń petitsiiany mindetti túrde qaraýy úshin qansha adam oǵan qol qoiýýy kerektigin aiqyndap alǵan jón», - dedi Aida Balaeva.
Eske sala ketsek búgin elordada Prezidenttik kadrlyq rezervtegi jastar birqatar ministrmen kezdesý ótkizdi. Naqtyraq aitqanda iriktelip, rezervke engen jastarmen kezdesýge Aqparat jáne qoǵamdyq damý ministri Aida Balaeva, Tsifrlyq damý, innovatsiialar men aeroǵarysh ónerkásibi ministri Baǵdat Mýsin, Prezident ákimshiligi basshysynyń orynbasary Málik Myrzalin, sondai Prezidenttiń kómekshisi Erlan Qarin shaqyrylǵan. Basqosýdyń basty maqsaty – Prezident Joldaýyn talqylap, aldaǵy ýaqytta Prezidenttik jastar kadrlyq rezervin damytyp, júzege asyrýdy josparlaý.
