Búgin Nur-Sultan qalasynda Turaqty damý jáne innovatsiialar boiynsha ekinshi Ortalyq Aziia forýmy ótti, dep habarlaidy "Ult aqparat" QazAqparat agenttigine silteme jasap.
QR Prezidenti Ákimshiligi ishki saiasat bóliminiń meńgerýshisi Aida Ǵalymqyzynyń aitýy boiynsha, álemniń úzdik oqý oryndarynda bilim alyp, tájiribe jinaǵan qazaqstandyq jas ǵalymdardyń birigýi - quptarlyq qadam. Bul jaǵdaida elimizde ǵylymi jobalarǵa suranys naryǵynyń qurylýy ońtaily bolmaq.
Sonymen qatar ol bul máselede qazaqstandyq biznes-qoǵamdastyqtyń qoldaýy mańyzdy ekenin atap ótti. Osy oraida biznes tarapy otandyq ǵalymdardyń áleýetti jobalary týraly egjei-tegjeili habardar bolǵany abzal.
«Sizderdiń biznespen ózara is-qimyldyń ońtaily tájiribesi elimizdiń barsha jas ǵalymdaryn ortaq tuǵyrnamada biriktirýge jáne ǵylym men biznestiń konstrýktivti dialogyn iske qosýǵa kómektesýine tilektespin», - dedi A. Balaeva.
QR Prezidenti Ákimshiligi ishki saiasat bólimi meńgerýshisniń pikirine súiensek, Qazaqstan jastaryn ǵylymǵa tartý úshin de qajetti jaǵdailar jasalyp jatyr.
Aida Ǵalymqyzynyń atap ótýinshe, búgingi shara Elbasy jariialaǵan Jastar jyly aiasynda ótip jatqany simvoldyq mánge ie. Bul, óz kezeginde, qazaqstandyq ǵylymdy damytýǵa tyń serpin berýde mańyzdy kezeń bolady.
«Elimiz basshylyǵynyń saiasaty arqasynda búginde Qazaqstanda jastardy ǵylymǵa tartý úshin qajetti jaǵdailar jasalýda. Ǵylymdy damytý - jahandyq álemde Qazaqstannyń básekege qabilettiginiń negizgi faktory retinde moiyndalady. Elbasy tapsyrmasy boiynsha jyl saiyn jas ǵalymdardyń zertteýlerin júzege asyrýǵa úsh milliard teńgeden qosymsha kvota bólinetin bolady», - dedi ol.
Sondai-aq, onyń aitýynsha, elimizdiń jas ǵalymdary qazaqstandyq jáne álemdik ǵylymdy damytýǵa laiyqty úlesin qosyp keledi.
«Ǵylymdy damytý - jahandyq álemde Qazaqstannyń básekege qabilettiliginiń negizgi faktory retinde moiyndalady», - dedi Aida Balaeva.
Prezidenttik biregei «Bolashaq» baǵdarlamasynyń arqasynda jas ǵalymdar ózderiniń zertteýlerin álemniń ozyq ǵylymi ortalyqtarymen seriktestikte júrgizip júr.
«Sonymen qatar, startaptar men jańa tehnologiialyq óndiristerdi damytý úshin mańyzdy ekoorta retinde Nazarbaev Ýniversitetiniń ǵylymi-innovatsiialyq parki belsendi damyp keledi. Úzdik bilim men tájiribeni alǵan bizdiń jas ǵalymdar qazaqstandyq ári álemdik ǵylymdy damytýda óziniń laiyqty úlesin qosatynyna senimdimin», - dedi Aida Balaeva.
Aita keteiik, is-sharany QR Bilim jáne ǵylym ministrligi, Ulybritaniiadaǵy qazaqstandyq doktoranttar qaýymdastyǵy jáne Qazaqstan Respýblikasynyń Ulybritaniiadaǵy Elshiligi uiymdastyrdy.
Forým maqsaty - ideialar men jobalardy ilgeriletý úshin jas ǵalymdardy biriktirý, áleýetti investorlarmen jáne seriktestermen bailanystardy ornatý.
