Foto: Dmitri Kotjuh / Järva Teataja
"QazMunaiGaz" ulttyq kompaniiasy tóraǵasynyń orynbasary Dmitrii Makeev elimizdegi janarmai quiý beketterindegi AI-95 markaly benzin tapshylyǵyna qatysty suraqqa jaýap berdi, - dep habarlaidy Tengrinews.kz.
Makeevtiń aitýynsha, qazir AI-95 markaly benzindi óndirýge kúshtiń negizgi bóligi Atyraý munai óńdeý zaýytyna túsken. Osyǵan bailanysty janarmai quiý beketterindegi benzin tapshylyǵy janar-jaǵarmai áli jetkizilip úlgermegendikten bolyp otyr.
"Bul eń aldymen, logistikaǵa bailanysty. Óitkeni janar-jaǵarmai materialdaryn batystan ońtústik aimaqtarǵa jetkizý eki aptaǵa sozylýy múmkin. Qazir olarda ónim bar, sondyqtan jolǵa shyǵýǵa daiyndalyp jatyr. Degenmen bizdiń elimiz óte úlken jáne qashyqtyq ta birshama alys, sol úshin bizde logistika ýaqyt alady. Biz tiisti tehnikalyq is-sharalar ótkizdik. "Atyraý munai óńdeý zaýyty" óndiristiń úlken kólemin óz moinyna aldy jáne bizde kelisilgen kólemder oryndalyp jatyr", - dedi "QazMunaiGaz" tóraǵasynyń orynbasary.
Jýrnalister Makeevten bul jaǵdaida baǵyttardy qaita qarap, janar-jaǵarmai jetkizý úderisin qalai jedeldetýge bolatynyn surady.
"Biz Energetika ministrligimen, "Qazaqstan temir jolymen" únemi jumys isteimiz. Eger jetkizilimderdiń qozǵalysy basymdyqqa ie bolýy úshin shuǵyl túrde "jasyl dáliz" qajet bolsa, turaqty túrde jumys isteimiz. Biraq biz tasymaldaýdyń fizikalyq ýaqytyn ózgerte almaimyz. Bul - siz oilaǵandai fizikalyq qozǵalys. Jetkizýdiń belgili bir úzilisteri bar. Bul ońai protsess emes ekenin túsiný kerek. Biz bul syn oryndy ekenin moiyndaimyz, onymen jumys istep jatyrmyz", - dedi Makeev.
