Aldaǵy 5 jylda elimizdiń agroónerkásip kesheninde 4,5 trln teńgeniń 845 jobasy iske asady. Bul týraly búgin Úkimet otyrysynda QR Aýyl sharýashylyǵy ministri Saparhan Omarov aitty, dep habarlaidy QazAqparat.
«Qazirgi tańda ministrlik Agroónerkásip keshenin damytý boiynsha 2021-2025 jyldarǵa arnalǵan ulttyq jobasyn ázirleýde. Onyń negizgi áleýmettik-ekonomikalyq mindetteri: 1 mln aýyl turǵynynyń tabysyn turaqty arttyrý; 70 myń otbasylyq sharýashylyq qurý; 500 myńǵa jýyq adamdy aýyl sharýashylyǵynda jumyspen qamtý; 350 myń fermerlik jáne úi sharýashylyqtaryn tarta otyryp, 7 ekojúie qurý», - dedi ol.
Ministrdiń atap ótýinshe, atalǵan mindetterge qol jetkizý úshin aýylda turaqty jumys oryndaryn qurýǵa jáne aýyl halqynyń tabysyn arttyrýǵa múmkindik beretin investitsiialyq jobalar iske asyrylady.
«Jalpy respýblika boiynsha bes jyl ishinde 4,5 trln teńge somaǵa 845 investitsiialyq jobany iske asyrý kózdelgen. Onyń ishinde biyl 335 mlrd teńge somasyna 285 jobany engizý josparlanýda. Qazirgi tańda atalǵan investitsiialyq jobalar óńirlerdiń ákimdikterimen jáne investorlarmen pysyqtaldy. Sáikes Jol kartalary bekitilip, onyń aiasynda mnistrlik turaqty túrde olardyń iske asyrylýyna baqylaý jáne monitoring júrgizýde. Bul jobalar Memleket basshysynyń 7 iri ekojúieni qurý jónindegi tapsyrmasynyń ajyramas bóligi bolady. Onyń sheńberinde dándi jáne maily daqyldardy, jemister men kókónisterdi, qantty, et pen sútti óndirý jáne óńdeý boiynsha ekojúieni qurý jónindegi investitsiialyq jobalardy iske asyrý josparlanýda», - dedi ministr
Máselen, onyń dereginshe, Soltústik Qazaqstan oblysynda astyq óndirý jáne óńdeý jónindegi «BioOperations» JShS zákirlik kásiporny bar ekojúiesi qurylýda. Ol astyq daqyldaryn tereńdete qaita óńdeý zaýytyn, qurama jem zaýytyn, qus sharýashylyǵy keshenin, sút-taýarlyq fermasyn jáne atalǵan kásiporyndardy shikizatpen qamtamasyz etetin aýyl sharýashylyǵy óndirýshilerin biriktiredi.
