Memlekettik qyzmet ister agenttigi memqyzmetshilerdiń qosymsha ispen ainalysýyna qatysty túzetýler boiynsha túsinikteme berdi, dep habarlaidy QazAqparat.
«27 jeltoqsanda Memlekettik qyzmet ister agenttiginiń tóraǵasy OKQ-da ótken baspasóz konferentsiiasy barysynda memlekettik qyzmetshilerdiń qosymsha qyzmetpen ainalysýyna qatysty zańnamalyq túzetýler engizý máselesin pysyqtaý týraly aqparat berdi.
Qazirgi ýaqytta qoldanystaǵy zańnama memlekettik qyzmetshilerdiń ǵylymi, pedagogikalyq jáne shyǵarmashylyq qyzmetpen ainalysýyna múmkindik beredi», - delingen túsindirmede.
Agenttiktiń baspasóz qyzmeti taratqan málimet boiynsha, bul sanattar arnaiy jáne/nemese biregei daǵdylary men bilimi, sondai-aq bos ýaqyty bar memlekettik qyzmetshilerdi qamtymaidy.
«Mysaly, memlekettik qyzmette jumys isteitin dáriger jumystan bos ýaqytynda meditsinalyq uiymdarda jaldaý boiynsha emdeý praktikasymen ainalysa alady. Tabysty sportshylar óz tájiribesin óskeleń urpaqqa bere alady, tiisti sertifikaty bar zańgerler sharttarǵa nemese kelisimsharttarǵa, kólik júrgizýge, sondai-aq jaldaý boiynsha jumystardyń ózge de túrlerine saraptama júrgize alady.
Memlekettik qyzmetshilerdiń quqyqtaryn iske asyrý maqsatymen zań jobasynda memlekettik qyzmetshilerge negizgi jumysynan bos ýaqytynda, «múddeler qaqtyǵysy» týraly normany saqtai otyryp oryndai alatyn jumystan tabys alýǵa zańdy múmkindik berý usynylady.
Bul olardyń kópshiliginiń erekshe daǵdylaryn saqtaýǵa, damytýǵa jáne taratýǵa yqpal etedi», - dep jazady vedomsvtonyń baspasóz qyzmeti.
Sondai-aq, resmi túsindirmede kásipkerlik qyzmet pen aqy tólenetin ózge qyzmet túrlerin shatastyrýǵa bolmaityny aitylǵan.
«Iaǵni, bul «jaldaý arqyly» atqarylatyn jumysty bildiredi. Bul memlekettik qyzmetshi oryndaityn fýnktsiialardan paida alýdy kózdemeidi.
Aita ketý kerek, mundai tájiribe alys shetelderde de bar. Mysaly, Angliia men Finliandiiada joǵary turǵan basshylyqtyń kelisimimen ekinshi jumysqa ie bolýǵa bolady. Bul rette múddeler qaqtyǵysyna nemese tiimdiliktiń tómendeýine jol berilmeidi», - delingen resmi málimette.
Eske salsaq, mundai bastamany QR Memlekettik qyzmet isteri agenttiginiń tóraǵasy Anar Jaiylǵanova ortalyq kommýnikatsiialar qyzmetinde ótken brifingide málim etken bolatyn.
«Nelikten olarǵa qosymsha jumys isteýge bolmaidy? Bolady. Biraq kásipkerlikpen emes. Mysaly, jumystan bos kezinde taksist bolyp jumys isteýge bolady degen siiaqty. Otbasyn asyraýǵa qosymsha qarajat kerek bolsa, soǵan ruqsat beretindei zańnamalyq ózgerister daiyndap jatyrmyz. Biraq ol áli qabyldanǵan joq. Al kásipkerlikpen ainalysýǵa bolmaidy», - degen Anar Jaiylǵanova.
