Qarjy naryǵyn retteý jáne damytý agenttigi nesie raqymshylyǵy máselesi boiynsha dáieksiz aqparatqa qatysty túsinik berdi, dep habarlaidy QazAqparat.
Agenttikten málim etkendei, keshe áleýmettik jelilerde «ipotekalyq turǵyn úi qaryzy boiynsha kredit raqymshylyǵy jariialanypty-mys» degen aqparat taratyldy.
Osyǵan orai Qarjy naryǵyn retteý jáne damytý agenttigi taratylǵan aqparattyń dáieksizdigin málimdedi.
«Qazirgi ýaqytta 2007-2008 jyldardaǵy álemdik qarjy daǵdarysynan, sondai-aq ulttyq valiýta baǵamynyń álsireýinen barynsha zardap shekken ipotekalyq qaryz alýshylardyń jeke sanatyna kómek kórsetý úshin agenttik 2015 jyldan ipotekalyq qaryzdardy qaita qarjylandyrý baǵdarlamasyn iske asyryp jatyr.
Osyǵan orai, baǵdarlama talaptary boiynsha qarjylyq qoldaý 2004 – 2009 jyldar aralyǵyndaǵy kezeńde ipotekalyq qaryz alǵan, sondai-aq, 2016 jylǵy 1 qańtarǵa deiin valiýtalyq ipotekalyq qaryz alǵan qaryz alýshylarǵa kórsetiledi.
Baǵdarlamada belgilengen qarjylai kómek sharalary jalǵyz baspanasy bar qaryz alýshylar jáne halyqtyń áleýmettik osal toptary sanatyndaǵy boryshkerler úshin paiyzdyq mólsherlemeni 3%-ǵa deiin tómendetýdi kózdeidi.
Qalǵan valiýtalyq ipotekalyq qaryz alýshylar úshin paiyzdyq mólsherleme 12%-dan aspaidy.
Budan basqa, baǵdarlama sheńberinde syiaqy, aiypaqy (ósimpul, aiyppuldar) jáne komissiia boiynsha merzimi ótken bereshek esepten shyǵaryldy.
Valiýtalyq ipotekalyq qaryzdarǵa qatysty bereshekti Ulttyq banktiń 2015 jylǵy 18 tamyzdaǵy baǵamy boiynsha (1 AQSh dollary úshin 188,35 teńge) teńgege konvertatsiialaý júrgizildi.
2020 jylǵy qańtardan bastap baǵdarlamaǵa qatysatyn HÁOT sanatyndaǵy ipotekalyq qaryz alýshylar úshin qosymsha kómek sharalary iske asyrylýda.
Mundai qaryz alýshylarǵa qoldaýdy bankter olardyń qarjylyq jáne áleýmettik jaǵdaiyn jan-jaqty taldaý negizinde jeke tártippen kórsetýde, taldaý nátijelerinen keiin bankter qaryz boiynsha bereshekti tómendetý jáne 20 000 teńge mólsherindegi ai saiynǵy tólemmen jeńildik berilgen kesteler belgileý týraly sheshim qabyldaidy.
Qaryz alýshylardyń bul sanatyna qoldaý kórsetý 2021 jyldyń sońyna deiin aiaqtalady.
Azamattar men buqaralyq aqparat quraldarynan dáieksiz málimetterge senbeýdi jáne resmi ári tekserilgen derekkózderinen ǵana alynǵan aqparatty basshylyqqa alýdy suraimyz», - delingen habarlamada.
Ipotekalyq qaryzdardy qaita qarjylandyrý baǵdarlamasynyń talaptary men nátijeleri týraly tolyǵyraq aqparatty agenttiktiń resmi saitynan alýǵa bolady.
