QR Sybailas jemqorlyqqa qarsy is-qimyl agenttiginde vedomstvo basshysy Alik Shpekbaevtyń tóraǵalyǵymen Bilim jáne ǵylym ministrligin ońtailandyrý máselesine arnalǵan jumys otyrysy ótti, dep habarlaidy "Ult aqparat".
Atalǵan agenttik málimetinshe, otyrys barysynda «Adal Bilim» jobalyq keńsesi BǴM-nyń jekelegen vedomstvolyq baǵynyshty uiymdarǵa aralyq taldaý nátijelerin usyndy. Keńse ákimshisi Sergei Pen usynǵan derekterge sáikes, kvazimemlekettik sektordyń saraptalatyn sýbektileriniń maqsattary men mindetterin saralaý nátijelerinde olardyń keibir fýnktsiialary BǴM departamentteriniń fýnktsiialaryn qaitalaityny, sondai-aq memlekettik qarjylandyrýdyń burynǵy kólemi jaǵynan qaraǵanda keibir uiymdardyń fýnktsiialarynyń ózektiligin joiǵany anyqtaldy.
Mysaly, «Órleý» BAUO» AQ 50 paiyzǵa iske qosylmaǵan jáne «Nazarbaev intelektýaldyq mektepteri» janyndaǵy pedagogikalyq sheberlik ortalyǵy men onyń filialdarynyń, sonymen qosa jekemenshik oqý ortalyqtarynyń, uiymdardyń biliktilikti arttyrý kýrstary baǵdarlamalaryn qaitalaidy. Buǵan qosa, memlekettik tapsyrmalardy tiimsiz iske asyrý belgileri anyqtaldy. Atap aitqanda, «Kásipqor» holdingi» KEAQ-nyń «CLIL ádistemesi: arnaiy pánderdi aǵylshyn tilinde oqytý protsesinde pándik-tildik biriktirip oqytý» biliktilikti arttyrý baǵdarlamasy. Atalǵan baǵdarlamanyń 20 tyńdaýshysynyń tek úsheýi ǵana kýrs materialdaryn túsiný úshin aǵylshyn tilin jetkilikti deńgeide bilgen. Sebebi olar aǵylshyn tiliniń oqytýshylary bolǵan. Qalǵan tyńdaýshylar saýalnama-pikirde aǵylshyn tilin bilmeitindikterin, kýrs aǵylshyn tiliniń «Intermediate» deńgeiinen tómen emes nátijesi bar tyńdaýshylarǵa eseptelip jasalǵanyn mańyzdy másele retinde atap ótedi.
Sondai-aq, saraptama qyzmetkerlerge negizsiz jáne jasyryn syiaqy berý faktileriniń bar ekenin kórsetti.
Atap aitqanda, BǴM-ǵa baǵynyshty keibir uiymdardaǵy syiaqy mólsheri qyzmet nátijesine qatyssyz qyzmetkerlerdiń bir laýazymdyq eńbekaqysynan bastap 400 paiyzǵa deiin mólsherde boldy. Materialdyq-tehnikalyq bazany saraptaý barysynda sanaýly qyzmetkeri bola tura ǵimarattar men bólmelerdi tiimsiz paidalaný faktileri anyqtaldy. Atap aitqanda, nebári 70 adam shtaty bar «Kásipqor» holdingi» KEAQ-nyń jalpy aýmaǵy 1567 sharshy metrdi quraityn ǵimaratty jalǵa alý shyǵyny 52 547 140 teńgeni quraidy. Al holding tóraǵasynyń orynbasary 144 sharshy metr keńse, 48 jáne 40 sharshy metrlik demalys, qabyldaý bólmesin, qurylymdyq bólimshe basshysy 175 sharshy metrlik kabinetke ie bolǵan.
S.Penniń pikirinshe, jyl saiyn qomaqty biýdjettik qarajattardy igeretin «Órleý» BAUO» AQ pen «Kásipqor» KEAQ» holdingi siiaqty Bilim jáne ǵylym ministrligine baǵynyshty uiymdar qyzmetiniń tiimdiligi men memlekettik tapsyrmalardy oryndaý tártibi kóbine kúmán keltiredi.
