Talǵat Súleimanov pen Murat Ońalbaevtyń advokaty Almaty oblysynda qaza tapqan aǵaiyndylardyń ólimine qatysty oqiǵanyń mán-jaiyn aityp berdi, - dep habarlaidy kaz.tengrinews.kz tilshisi. Aita keteiik, Jambyl oblysynda Suranshy batyr aýylynyń 44 jáne 41 jastaǵy turǵyndary úsh er adamdy - Jarqynbek Doldandy, Muqiiat Zarylhandy jáne Álimhan Qadylbekti óltirdi degen kúdikpen ustalǵan bolatyn.
Advokat Merkebek Mákenbaevtyń aitýynsha, onyń qorǵalýshylary osyǵan deiin sotty bolmaǵan. "Olardyń otbasylary bar. Árqaisysynda jeke jer úi men maly bar. Súleimanovtyń úsh uly bar - kenje uly úsh jasta. Ońalbaevtyń da úsh uly bar. Olar Uzynaǵashtan 25 shaqyrym jerdegi aýylda turady", - dedi advokat.
Sonymen qatar, advokattyń aitýynsha, qaitys bolǵan aǵaiyndylar men kúdiktiler tanys bolmaǵan. Kúdiktilerden alynǵan jaýap boiynsha, oqiǵanyń hronologiiasy bylai órbigen:
"17 qyrkúiekte Súleimanov Uzynaǵashtaǵy mal bazaryna barady. Ol mal sharýashylyǵymen ainalysady. Senbiden jeksenbige qaraǵan túni bazarda ádette adamdar kópter jinalady: bireý mal ákeledi, ekinshisi oryn alyp qoiady. Osylaisha meniń qorǵalýshym da sol kúni bazarǵa kelip, óziniń 2-3 buzaýyn satady. Keiinnen Súleimanov eki KamAZ-ben mal ákelgen aǵaiyndylardy kórip, olarmen saýdalasa bastaidy. Súleimanov 16 bas siyr satyp alady", - dep baiandady advokat.
Alynǵan taýar úshin kúdikti Súleimanov satýshylarǵa 2 million teńgeden asa aqsha beredi. Sodan kúdiktiler aǵaiyndylardyń KamAZymen maldardy Suranshy batyr aýylyna aparady. Jolda Súleimanov óziniń aýyldasy Ońalbaevqa habarlasyp, odan maldardy kólikten shyǵarýǵa kómektesýin suraidy. 28 qyrkúiekte shamamen saǵat 13.00-de olar Súleimanovtyń úiine kelip, maldardy sonda qaldyrady. Aita keteiik, olar aǵaiyndylardyń 36 malyn satyp alamyz dep kelisken eken.
"Sodan Súleimanov olardy aldap, 20 maldy onyń taý jaqta turatyn týysy alǵysy keletinin aitady. Sonda qalǵan aqshany beremiz dep kelisken. Olar aǵaiyndylarǵataǵy eki million 800 myń teńge tóleý kerek bolatyn. Osylaisha mal satýshylar kelisip, meniń qorǵalýshym ózimen birge vinchester alyp shyǵady. Aǵaiyndardyń "Nelikten qarý alyp shyqtyń?" degen suraǵyna Súleimanov onda qasqyrlar kóp dep, qarýdy qoishylarǵa aparyp beretinin aitqan", - dedi Merkebek Mákenbaev.
Taýǵa barýǵa kelisken úsh aǵaiyndy men kúdiktiler osylaisha jolǵa shyǵady. Olardyń sońynan sur tústi Mercedes kóligin júrgizip kele jatqan Ońalbaev keledi. Taýdaǵy qoraǵa jaqyndaǵan boida olar Sýly sai shatqalynyń aldyna baryp toqtaidy. Osy jerde kúdiktiler aǵaiyndy úsheýdi atady.
Osydan keiin, advokattyń aitýynsha, kúdiktiler KamAZ-ben Qansheńgel jaqqa aparyp, máiitterdi kómip ketken. Jol boiynda júk kóligi buzylady. Sóitip, olar ot jaǵamyz dep, baiqaýsyzda kóliktiń kabinasyn órtep jiberedi. Kólikti sonda qaldyryp, ózderi úilerine qaityp ketken.
Advokat kúdiktilerdiń bul qylmysty aldyn ala oilastyrmaǵanyn málimdedi.
Eske salaiyq, Taldyqorǵan qalasyna jaqyn mańdaǵy Kóksý aýdanynyń 3 turǵyny Almaty jaqtaǵy Uzynaǵash bazarynda mal satamyz dep iz-tússiz joǵalyp ketken bolatyn.
Keiinirek olardyń óli tabylǵany habarlanǵan edi. Vedomstvodaǵylardyń aitýynsha, marqumdardyń denesinde zorlyq belgiler bar. Politseiler kisi óltirdi degen kúdiktilerdi ustapty. Olar Jambyl aýdanynyń eki turǵyny. Qazirgi ýaqytta QR Qylmystyq kodeksiniń 99-baby ("Adam óltirý") boiynsha sotaldy tergeý bastalypty. Kúdiktiler ýaqytsha ustaý izoliatoryna qamaldy. Aita keteiik, ustalǵandar eki aiǵa qamaýǵa alyndy - 24 qarashaǵa deiin.
Keiinirek Saǵyntaev Almaty oblysynda óltirilgen aǵaiyndylardyń oqiǵasyna qatysty pikir bildirgen bolatyn. Sondai-aq, májiliste de qaza tapqan aǵaiyndylardyń oqiǵasyna qatysty áńgime bolǵan edi.
