Munai urlyǵy, uiymdasqan qylmystyq top qurý, munaidy zańsyz tasymaldaý men satý, reiderlik jolmen biznesti tartyp alý baptary boiynsha sottalǵan "Aǵaiyndy tórteý" uiymdasqan qylmystyq tobynyń lideri Erkin Izbasar arada úsh jyl ótkende bostandyqqa shyqty, dep habarlaidy "Ult aqparat".
№2 Óskemen qalalyq soty biyl 21 qazan kúni Shyǵys Qazaqstan oblystyq QAJD OV-156/20 bastyǵynyń usynysy boiynsha jazasyn óteýshi Erkin Izbasarǵa qatysty isti qarady. Usynysta jazasyn óteýshiniń densaýlyǵy nasharlaǵany jazylǵan.
Qylmystyq kodekstiń «Aýrýǵa shaldyǵýyna bailanysty jazadan bosatý» babyna súiensek, ómir boiyna bas bostandyǵynan aiyrýdan basqa, jazany óteýge kedergi jasaityn ózge de aýyr naýqastan zardap shegýshi adamdy sot jazany óteýden bosatady nemese naýqasynyń sipaty, jasalǵan qylmystyq quqyq buzýshylyqtyń aýyrlyǵy, sottalǵan adamnyń jeke basy jáne basqa da mán-jailar eskerile otyryp, jaza neǵurlym jeńil jaza túrimen aýystyrylýy múmkin.
«Sot arnaiy meditsinalyq komissiianyń qorytyndysyn, sottalýshynyń dertiniń aýyrlyǵyn, taraptardyń pikirlerin eskere otyryp, sottalǵan Izbasardiń densaýlyǵynyń qalpyna kelýine deiin bosatty. Sottalǵan adamnyń minez-qulqyn baqylaý úkimdi oryndaityn organǵa júkteledi. Qazirgi ýaqytta qaýly kúshine endi», - dep habarlady №2 Óskemen qalalyq sotynyń baspasóz qyzmeti.
Aita keteiik, 2018 jyly sot úkimimen "Aǵaiyndy tórteý" uiymdasqan qylmystyq tobynyń lideri Erkin Izbasar 12 jylǵa bas bostandyǵynan aiyrý jazasyna kesilgen ári jazasyn qaýipsizdigi barynsha joǵary koloniiada ótegen. Izbasarǵa on bap boiynsha, onyń ishinde qylmystyq top uiymdastyrǵany jáne 39 million teńge somasynda munai urlaǵany úshin aiyp taǵyldy, sondai-aq qylmyspen tapqan múlki tárkilendi.
Al onyń janynda júrgen Aýhat Qaliev 11 jylǵa, sol jyldary oblystyq IID bastyǵynyń orynbasary qyzmetin atqarǵan Rahat Ahanov 5 jyl 3 aiǵa sottaldy. Burynǵy politsiia qyzmetkeri ómir boiy quqyq qorǵaý organdarynda jumys istei almaidy, politsiia polkovnigi sheninen aiyryldy.
