Batys Qazaqstan oblysy politsiia departamenti aýyldyq órt sóndirý bólimi bastyǵynyń ólimine qatysty tyń derekter jariialady. 46 jastaǵy Aqan Nurǵaliev óz týysynyń saraiynda ólimshi etip sabalǵan kúide tabylǵan. Kelesi kúni azamat Aqjaiyq aýdandyq aýrýhanasynda kóz jumdy dep habarlaidy KAZ.NUR.KZ.
Politseiler málimetine súiensek, marqum men Qaraýyltóbe aýyly turǵynynyń arasynda kikiljiń týyndaǵan. Órt sóndirý bóliminiń bastyǵy bógde adamnyń kólikti ózine qarasty obektiniń aýmaǵyna qoiatynyna narazylyq bildirgen.
"№27 órt sóndirý bóliminiń bastyǵy kúdiktiniń úiine barady. Ol azamatqa nysan aýmaǵyna kólik qoimaýdy eskertedi. Azamattardyń arasynda janjal týady. Keiin 29 jastaǵy kúdikti mas kúiinde órt sóndirý bólimine barady. Ol qyzmetkerlerden bastyqty shaqyrýdy suraidy. Artynsha oǵan judyryq jumsai bastaidy. Tóbelesten keiin eki azamat ta bólim aýmaǵynan ketip qalady",- deidi BQO PD resmi ókili Bolatbek Belgibekov. Taǵy da
Al 26 naýryz kúni Aqan Nurǵaliev týǵan aǵasynyń úiindegi saraida sabalǵan kúii tabylypty. Azamattyń segiz qabyrǵasy synyp, basy túgeldei kógergen eken.
Ókinishke qarai, dárigerler Nurǵalievti qutqara almady, ol alǵan jaraqattary saldarynan jansaqtaý bóliminde qaitys boldy. Al kúdikti - jumyssyz, birneshe ret isti bolǵan.
"Kúdikti ustaldy. Onyń osyǵan deiin zańǵa qatysty máseleleri bolǵan. Ustalǵan azamatqa qatysty Qylmystyq kodekstiń 106-baby 1-bóligi (aýyr dene jaraqatyn salý) boiynsha qylmystyq is qozǵaldy. Jábirlenýshiniń qaitys bolýyna bailanysty is osy baptyń úshinshi bóligi boiynsha qaita saralandy. Sanktsiia 12 jylǵa deiin bas bostandyǵynan aiyrýdy kózdeidi",- dedi politsiiada.
Oblystyq TJD marqum týystary men jaqyndaryna tiisti kómek kórsetti.
