Afinada Kitaphanalyq qaýymdastyqtar men mekemeleri halyqaralyq federatsiiasynyń 85-shi Konferentsiiasy sheńberinde QR Ulttyq kitaphanasy men QR Grekiiadaǵy Elshiliginiń uiymdastyrýymen «Abai - Uly Dalanyń aqyny» atty ádebi kesh ótti, dep habarlaidy "Ult aqparat" elshilikke silteme jasap.
Is-sharaǵa Grekiianyń bedeldi akademiialyq, iskerlik ókilderi jáne de grekiialyq qoǵam jáne mádeniet qairatkerlerinen qurylǵan úlken top qatysty. Sonymen qatar, qonaqtar qatarynda diplomatiialyq missiialar men halyqaralyq uiymdar basshylary, jýrnalister, burynǵy otandastarymyz ben qazaq diasporasynyń ókilderi boldy.
Ádebi keshte sóz bastaǵan Qazaqstannyń Grekiiadaǵy Elshisi Aleksei Volkov QR Prezidenti Qasym-Jomart Toqaevtyń 30 mamyrda halqymyzdyń uly oishyly men aǵartýshysy Abai Qunanbaiulynyń 175-jyldyǵyn 2020 jylda atap ótý týraly tiisti Jarlyqqa qol qoiǵanyn aitty. Ol Hákim Abaidyń shyǵarmashylyǵyna grekiialyq oishylardyń rýhtandyratyn zor yqpaly tigendigine orai, is-shara grekiialyq uly filosoftardyń otanynda ótýi asa simvolikalyq mánge ie ekendigin sózine tiek etti. Osy oraida, Elshi Abaidyń 27-shi qara sózi – «Sokrat hákimniń sózi» dep atalatyndyǵyn erekshe atap ótti.
Is-shara barysynda otandyq elshi Qazaqstan men Grekiianyń Ulttyq kitaphanalary basshylaryna QR Elshiligi pen «MM Publication» grekiialyq kompaniiasynyń ortaq týyndysy «Qazaqstannyń Ulttyq kitaphanasyndaǵy grek tilindegi kitaptar katalogyn» syiǵa tartty. Bul taqyryptyq katalog Qazaqstan men Ortalyq Aziiadaǵy eń úlken kitaphanalarynyń birinde saqtalǵan grek tilindegi kitaptardyń júielendirilgen biregei jinaǵy bolyp tabylady. Otandyq diplomat basylym ishindegi kóptegen eńbekter tuńǵysh katalogqa engizilýine orai, erekshe ǵylymi qundylyqqa ie ekendigine toqtaldy.
Óz kezeginde, QR Ulttyq kitaphanasynyń direktory Baqytjamal Ospanova QR Elshiligi men grekiialyq tarapty ádebi keshti ótkizýge qolǵabys kórsetkenderi úshin alǵys bildirip, qatarynda Abai týraly 1909 jyly tuńǵysh jaryq kórgen kitaptyń kóshirmesi men aqynnyń shet el tilderinde basylyp shyǵarylǵan zamanaýi basylymdardan qurylǵan kollektsiialyq jinaqty tabystady.
Ádebi keshtiń aiaǵynda Grekiiany Qazaqstanmen odan ári tanystyrý maqsatymen otandasymyz Igor Toikinniń oryndaýynda Abai ánderi shyrqalyp, uly aqynymyzdyń eńbekteriniń kishigirim kórmesi uiymdastyryldy.
