QR Ekologiia, geoloiagi jáne tabiǵi resýrstar ministrligi Ekologiialyq retteý jáne baqylaý komitetiniń tóraǵasy Zulfuhar Joldasov Balqashtyń mańyna AES salý ekologiiaǵa qanshalyqty qaýipti ekeni týraly paiymyn aitty, dep habarlaidy QazAqparat.
«Balqash kóli Araldyń taǵdyryn qaitalaýy múmkin. Kól sýynda tuzy ben kúkirt dioksidiniń, aýyr metall men ýly shańnyń joǵary kontsentratsiiasy baiqalyp otyr. Soǵan qaramastan, AES salyný yqtimal oryn retinde Balqashtyń aýmaǵy qarastyrylyp otyr. Ol ideianyń avtorlary sizdermen sarapshy retinde aqyldasty ma?» - dep surady BAQ ókili Ortalyq kommýnikatsiialar qyzmetinde ótken brifingide.
Ministrlik ókiliniń aitýynsha, túbegeili sheshim áli qabyldanbaǵan.
«Qazirgi tańda Energetika ministrliginiń janyndaǵy úlken uiym zertteý júrgizip jatyr. Balqashtyń jaǵasynda salý týraly sheshim de bir nusqa retinde zerttelip jatyr. Bul máselede úsh negizgi faktor bar. Birinshisi – ekologiia máselesi. AES búkil ekologiialyq talaptarǵa sáikes bolsa ǵana salynady. Ekinshisi – qoǵamdyq tyńdaý. Qoǵam maquldasa ǵana joba qolǵa alynady. Úshinshisi – sýdy únemdeý máselesi. Bizge mamandar atom ónerkásibinde sýdy barynsha az tutynatyn tehnologiialar bar ekenin aitty. Iaǵni, tutynylýy yqtimal sýdyń kólemi ekojúiege, Balqashtyń sý qoryna keri áser etetindei mólsherde bolmaidy degendi aityp otyr. Bul ázirge keleshektiń enshisindegi másele, talqylanyp qana jatyr. Jobalaý kezinde mindetti túrde Sý komiteti qaraidy. Men ataǵan úsh másele eń negizgi quramdas bóligi bolady», - dedi Zulfuhar Joldasov.
Sondai-aq Balqash sýynyń azaiyp bara jatqany týraly áńgimege de pikir bildirdi.
«Bizdegi derekter boiynsha búginde Balqashtyń deńgeii túsip ketkenin kórip otyrǵan joqpyz. Biraq kezeń-kezeńmen baiqalatyn tendentsiia bar. Bul jerde eki úlken problema bar. Onyń biri – klimattyń ózgerýi, Balqashqa quiatyn sý kózderiniń, transshekaralyq ózender sýynyń azaiýy, muzdyqtardyń erýi. Balqashqa quiatyn sýdyń 70 paiyzy Ileden keledi. Al ol ózen bastaýyn Qytaidan bastaý alyp jatyr. Sáikesinshe, kórshi elden aǵyp keletin sýdyń azaiýy problemasy da bar. Ol boiynsha transshekaralyq ózenderge bailanysty kelissóz júrip jatyr», - dedi komitet basshysy.
