Ózbekstan prezidenti Shavkat Mirziiaev parlament maquldaǵan atom energiiasyn beibit maqsatta paidalaný týraly zańǵa qol qoidy. Bul aqparatty UzReport.news saity habarlady.
Resmi habarlamaǵa sáikes, bul zań atom energetikasyn paidalanýdyń negizgi qaǵidalaryn anyqtap, iadrolyq jabdyqtar, saqtaý pýnkteri siiaqty atomdy paidalaný nysandaryn bekitedi.
Qujat sonymen birge ulttyq iadrolyq infraqurylymdy damytý, saqtaý qoimalary men iadrolyq qondyrǵylaryn jabdyqtaý siiaqty atom energiiasyn paidalaný salasynda memlekettik saiasattyń baǵyt-baǵdaryn anyqtaidy. Zań iadrolyq qarý jáne ózge de iadrolyq jarylǵysh zattardy shyǵarýǵa tyiym salady.
2018 jyly kúzde Resei men Ózbekstan úkimeti atom energetikasy salasynda áriptestik ornatý týraly kelisimge qol qoiǵan. Oǵan sáikes, Resei Ózbekstanǵa "3+" býynyna tiesili eki energobloktan quralǵan 2,4 gigavattyq atom elektr stantsiiasyn nesiege salyp bermek. Ózbekstandyq aqparat quraldarynyń habarlaýynsha, eki el jyl sońyna deiin AES salý týraly kelisim-shartqa qol qoiady. Qurylys jumystary 2022 jyly bastalmaq.
Áýel basta AES Týdakýl sý qoimasy mańyna salynady dep habarlandy. Keiinnen AES-tyń eldiń soltústik-shyǵys bóliginde Jizaq oblysynda salynatyny belgili boldy. Ózbekstandyq aqparat quraldary qyrkúiek aiynyń basynda reseilik mamandardyń Jizaq oblysynda geofizikalyq-seismologiialyq jumystar júrgize bastaǵanyn habarlady.
Atom elektr stantsiiasy salynatyn mań Qazaqstanǵa óte jaqyn ornalasqan. Eldiń ońtústigindegi Shardara men Jizaq oblysy ortalyǵynyń ara qashyqtyǵy 230 shaqyrymnan asady.
Atom elektr stantsiiasy siiaqty qorshaǵan ortaǵa áseri bar iri jobalardy júzege asyrǵan kezde álem elderi kóbine BUU-nyń Eýropalyq ekonomikalyq komissiiasy bastamasymen qabyldanǵan Shekaralas turǵyda qorshaǵan ortaǵa áserdi baǵalaý týraly konventsiiasyn basshylyqqa alady. Konventsiiaǵa sáikes, AES salýdy josparlap otyrǵan el kórshi memleketterge joba jaily múmkindiginshe erterek eskertip, habar berýi tiis.
Buǵan deiin Qazaqstannyń energetika ministrligi Azattyqqa Ózbekstan bul konventsiiany qabyldamaǵandyqtan ózbek tarapynan qazaq jaǵyna AES salý jaily habarlama túspegenin aitqan.
