Keleshekte "Baiqońyr" ǵarysh ailaǵynan zymyrandardy ózimizdiń mamandar ushyratyn bolady. Qazirgi ýaqytta 90-nan astam maman Reseide tájiribe jinaqtap jatyr. Bul týraly Ortalyq kommýnikatsiialar qyzmetinde ótken baspasóz máslihatynda QR Investitsiialar jáne damý ministrligi aeroǵarysh komiteti tóraǵasynyń orynbasary Erǵali Nurǵaliev aitty, dep habarlaidy "Ult aqparat" Baq.kz-ke silteme jasap.
"Baiqońyrda "Proton" zymyran tasyǵyshyn ushyrý jumystaryn osy kezge deiin tek reseilik mamandar qamtamasyz etip keldi. Biylǵy jyly 92 qazaqstandyq mamandy Reseidiń protondy ushyratyn kásipornyna jumysqa ornalastyrdyq. Osy mamandar aldaǵy ýaqytta biraz tájiribe jinaqtap, keiin ózimizde zymyran tasyǵyshtardy ushyratyn bolady", - dedi E.Nurǵaliev.
Onyń aitýynsha, 2020 jyldan keiin Baiqońyrdan "Proton" zymyran tasyǵyshy ushyrylmaýy múmkin. Búginde Qazaqstan Reseige osyndai talap qoiyp otyr.
"Reseige bizdiń el otyny zalaldy bolyp keletin Proton ushyrylymyn azaityp, 2020 jylǵa deiin ony múldem doǵarý máselesi qoiylǵan. Árine, Protonnyń ushyrylymy doǵarylǵan soń, qondyrǵylar Qazaqstannyń menshigine beriledi degen uiǵarym bar. Osylai bolýy da múmkin. Osyǵan daiyndalý úshin biz óz tarapymyzdan jumystar júrgizip jatyrmyz", - dedi ol.
Aita keteiik, "Protonnyń" ornyna 2025 jylǵa qarai Baiqońyrdan "Suńqar" zymyran tasyǵyshyn ushyrý josparlanǵan.
"Báiterek" degen birikken joba raketalardyń ushyrylýynan bolatyn zalaldy azaitý úshin jasalyp jatyr. Reseiden bizge jańa "Suńqar" degen zymyran tasyǵyshyn jasaý týraly usynys kelip tústi. "Proton" aýyr zymyran tasyǵyshy geptilmen ushsa, "Suńqar" orta sanattaǵy zymyran tasyǵysh bolyp tabylady. Biraq qýaty protonnan kem emes. Eger Reseimen birigip, osy jobany júzege asyratyn bolsaq, onda Baiqońyrdyń bolashaǵy bolady dep esepteimiz", - dep túiindedi sóz sońyn aeroǵarysh komitetiniń ókili.
.jpeg)