Advokat Býrhan Janseiitov quqyq qorǵaý organdarynyń jumysyna kedergi keltirip, arandatý áreketin uiymdastyrý kezinde qarjylyq monitoring agenttiginiń qyzmetkerine qol kótergen. Bul týraly agenttiktiń baspasóz qyzmeti málim etti, dep habarlaidy QazAqparat.
«Keshe Qarjylyq monitoring agenttigi reiderlik basyp alýmen ainalysqan adamdar tobyna qatysty tergeý nátijelerin jariialady. 12 shildede osy toptyń múddesin qorǵaǵan advokat Býrhan Janseiitov kúdiktilerge jasyryn baqylaý júrgiziletini týraly aqparat alyp, quqyq qorǵaý organynyń qyzmetkerlerine kedergi keltirdi.
Atap aitqanda, ol maqsatty túrde arańdatý áreketin uiymdastyrdy. B. Janseiitov jedel toptyń qyzmettik kóligine tosqaýyl bolyp, avtokóliktiń aldynǵy dóńgelegin tesip, terezesin syndyrmaq boldy. Ol maqsatty túrde qyzmetkerlermen janjal týyndatýǵa tyrysty.
Býrhan Janseiitov oqiǵa ornyna kelgen politsiia qyzmetkerleriniń talaptaryna jaýap bermedi, agressiia tanytty. Sondai-aq, ol Qarjylyq monitoring agenttiginiń qyzmetkerine qol kóterdi.
B. Janseiitov atalǵan oqiǵany tergeýge kedergi jasaý jáne jalǵan qoǵamdyq pikir qalyptastyrý maqsatynda uiymdastyrdy. Onyń jasaǵan áreketteri bilik organdary men qoǵamdyq tártipke qarama-qaishy dep tanylyp, B. Janseiitov qamaýǵa alyndy» - delingen Qarjylyq monitoring agenttiginiń habarlamasynda.
Sonymen qatar, B. Janseiitov ózge de advokattarǵa olardyń syrtynan quqyq qorǵaý qyzmetkerleri andyp júrgeni týraly aqparat taratqan. Qarjylyq monitoring agenttigi bul aqparattyń shyndyqqa janaspaitynyn málimdedi.
Eske sala ketiik, bul ýaqytqa deiin advokat Býrhan Janseiitov quqyq qorǵaý organdarynyń qyzmetine kedergi keltirgeni úshin qamaýǵa alynǵanyn jazǵan edik.
