Qazaqstan mádeniet jáne sport ministri Aqtoty Raiymqulova "Vitebsk-2019" vokalshylar konkýrsynyń gran-pri iegeri Ádilhan Makinmen kezdesti, dep habarlaidy Sputnik Qazaqstan.
Jas ánshi Almatydaǵy Temirbek Júrgenov atyndaǵy qazaq ulttyq óner akademiiasy estrada, óner fakýltetiniń 4-kýrsynda oqidy. Ol "Vitebsk-2019" vokalshylar konkýrsynda 180 upaidan 178 upai jinap, gran-pri júldesin jeńip aldy.
"Saǵan úlken alǵys bildiremiz. Qazaqstannyń mádeniet jáne sport ministrliginiń qoldaýymen ol jaqqa baryp keldiń. Seniń ónerińe álem tańǵaldy. Taǵy da quttyqtaimyn. Shyǵarmashylyq qabiletińdi shyńdai ber!", - dedi Aqtoty Raiymqulova.
Jas ánshi de qoldaý kórsetken tyńdarmandaryna sheksiz alǵysyn bildirdi.
"Qoldaý kórsetken qazaqstandyqtarǵa raqmet! Bul jeńisimdi Qazaqstan halqyna arnaimyn. Barlyńyzǵa zor densaýlyq, baqyt tileimin. Biyl - jastar jyly. Sondyqtan bizge kóp eńbektený kerek. Eńbek barlyq qiyndyqty jeńedi", - dedi Ádilhan Makin mádeniet ministrliginiń kýlýarynda.
Sondai-aq ol tanymal ánshi Dimash Qudaibergendi tanitynyn, ony qatty syilaitynyn jetkizdi.
"Dimash - meniń aǵam, qurdasym, dosym. Ekeýmiz 2012 jyly "Jas qanat" baiqaýyna qatystyq. Dimash sol baiqaýda jeńiske jetti. Sol kezden bastap men de jeńiske jetkim keldi. Dimash maǵan kúsh-qýat berip, qoldaý kórsetti. Onymen básekege túsýdi aitasyzdar, onymen tanysýdyń ózi úlken qurmet boldy", - deidi jas ánshi.
Ádilhan Makin toi mýzykasyna da qatysty pikir bildirdi.
"Bizge toi kerek. Sebebi, qazaq halqy toilatýdy jaqsy kóredi. Biraq ónerdiń qunyn túsirmeiik. Biz úlken sahnalarda qazaqtyń janǵa jaǵymdy shyǵarmalaryn oryndaýǵa tyrysaiyq", - dedi ol.
Osy oraidyń onyń ustazy Ianisa Kaisidi Ádilhannyń daýysy nesimen ereksheletinin túsindirdi.
"Onyń diapazony - 3 oktava. Ol tómengi joǵary, notalardy erkin ala alady. Bul mańyzdy. "Vitebsk-2019" vokalshylar konkýrsynda qazylar alqasynyń tóraǵasy bolǵan Tamara Gverdtsiteli "Ádilhannyń ýniversaldy vokalshy ekenin atap ótti. Qazirgi tańda sahnaǵa shyǵý az, adamdardy tańqaldyra bilý kerek. Ol óz maqsatyna jetti", - dep atap ótti Ianisa Kaisidi.
Ustazdyń aitýynsha, jurttyń ony Dimashpen salystyrýy beker emes.
"Dimash pen Ádilhan án oryndaǵan kezde oǵan ózindik naqysh qosqysy keledi", - dep túiindedi ol.
Aita keteiik, QR mádeniet jáne sport ministri Aqtoty Raiymqulovamen kezdesýge Ýkrainada ótken "Molodaia gilichina-2019" halyqaralyq án baiqaýynyń bas júldesin alǵan Qýanysh Erzatuly jáne I oryn júldegerleri Mereke Kenjeǵul men "Qazaq qyzdary" triosy da keldi.
"Kúlli álemge Uly dala eliniń óneri men mádenietin nasihattap júrgen eńbekterińizge sheksiz alǵysymdy bildiremin (...) Qazaqtyń qońyr úni halqymyzdyń mańdaiyna bitken baǵy desem, artyq aitqanym emes. Ózderińiz bilesizder, Ámire Qashaýbaev Parijdi qalai baǵyndyrsa, Dimashymyz milliardtaǵan halqy bar Qytaidy, keiinirek álemdi moiyndatty. Minekei, sizder de daryndaryńyzben kózge túsip, júldemen kelip otyrsyzdar. Shyn júrekten qýanyshtymyn. Bolashaqta álem sahnalarynda budan da qor jetistikterge jetetinderińizge senimdimin", - dedi ministr.
Sonymen birge, kezdesýde Qazaq ulttyq óner T. Júrgenov atyndaǵy óner akademiiasynyń rektory Ashat Maemirov QR Mádeniet jáne sport ministrligine alǵys bildirdi.
«Slavian bazary» - Eýraziia keńistigindegi bedeldi oryndaýshylar baiqaýy. Tórt jyl buryn Dimash osy baiqaýdan qanat qaǵyp ushty. Qazir álemdi baǵyndyrdy. Sizdiń de (Aqtoty Raiymqulova - red.) ana retinde Ádilhanǵa jazǵan qoldaýyńyzdy jetkizip júrdim. Taǵy bir aitarym, ánshi Tamara Gverdtsiteli bas júldeni tapsyryp jatyp, Qazaqstanda ónerge, mádenietke qoldaý bildirgeni úshin Elbasyǵa alǵys aitty. Ádilhan biyl birinshi ret taǵaiyndalǵan Belarýs prezidenti Aleksandr Lýkashenkonyń «Slavian úmiti» syilyǵyn jeńip aldy», - dedi Ashat Maemirov.
Byltyr bul baiqaýda («Slavian bazary») qazaqstandyq Ernar Sadyrbai júldeli 1-oryn ielense, 2015 jyly Dimash Qudaibergen tuńǵysh ret Gran-pri jeńip alǵan edi.
