Qazaqstandyq rejisser Ádilhan Erjanovtyń «Shtýrm» filmi 51-shi halyqaralyq Rotterdam kinofestivaliniń negizgi baǵdarlamasyna endi, dep habarlaidy QazAqparat.
Bul jaiynda Sháken Aimanov atyndaǵy «Qazaqfilm» kinostýdiiasy málimet taratty.
Film Big Screen Competition baiqaýy aiasynda kórsetiledi, al festivaldiń ózi 26 qańtar men 6 aqpan aralyǵynda onlain rejimde ótedi.
«Shtýrm» — reseilik LOOKFILM jáne FORESTFILM kompaniialarynyń qoldaýymen ShortBrothers prodiýserlik kompaniiasy túsirgen Qazaqstan-Resei birlesken týyndysy.
Sondai-aq jobany jasaýǵa «Qazaqfilm», Cinerental kinostýdiiasy jáne áigili Nomad Stunts kaskaderler toby atsalysty.
Basty rólderdi «Shákirt» jáne «Dvijenie vverh» filmderi arqyly tanymal reseilik akterler Aleksandra Revenko men rejisserler Kim Drýjinin jáne Andrei Shalopanyń «28 panfilovshy» jáne Aleksei Mizgirevtiń «Konvoi» filmderinde basty rólde oinaǵan Azamat Nyǵmanov somdady.
Filmniń akterlik quramynda Berik Aitjanov, Daniiar Alshynov, Nurlan Batyrov, Nurbek Muqyshev, Erken Ǵubashev jáne Erden Telemisov bar.
Filmniń stsenarii avtory jáne rejisseri - Ádilhan Erjanov. Prodiýserler Serik Ábishev, Olga Hlasheva, Aleksandr Plotnikov, Boris Hlebnikov, Natalia Drozd, Anna Tihonova, Ablaihan Áshimov, Jaidarbek Kúnǵojinov.
Filmniń siýjeti boiynsha, Qaratastaǵy mektepti belgisiz bireýler basyp alady. Olar balalardy kepilge alady, biraq talap qoimaidy.
Qarly boran saldarynan bailanys aqaýyna bailanysty jergilikti politsiia qaladan qosymsha kúsh surai almaidy.
Jergilikti ustaz Tazshy kómektiń kópke deiin kelmeitinin túsinip, balalary kepilde otyrǵan ata-analardan quralǵan shabýylshylar tobyn jinaidy.
Túnde olar shabýylǵa qatysty máselelerdi sheship, mańyzdy sheshim qabyldaýy kerek.
