Rejisser Ádilhan Erjanovtyń «Sary mysyq» kórkem filmi 77-shi Halyqaralyq Venetsiia kinofestivaliniń «Kókjiekter» konkýrstyq baǵdarlamasyna qatysady, dep habarlaidy "Ult aqparat" «Qazaqfilm» kniostýdiiasyna silteme jasap.
Álemniń eń iri jáne bedeldi festivalderiniń biri biyl 2-12 qyrkúiek aralyǵynda jandy formatta ótedi. «Kókjiekter» baǵdarlamasynyń halyqaralyq qazylar alqasyn ataqty frantsýz kinogeri Kler Deni («Jaqsy jumys», «Ishtegi jaidarly shýaq», «Aqsúiekter qoǵamy») basqarady.
«Sary mysyq» («Jeltaia koshka»)kinotýyndysyn Short Brothers (Qazaqstan) kompaniiasy, Sh.Aimanov atyndaǵy «Qazaqfilm» AQ (Qazaqstan) jáne Arizona Productions (Frantsiia) kinostýdiiasynyń qatysýymen ZERDE FILMS (Qazaqstan) kompaniiasy túsirgen.
«Sary mysyq» – rejisser Ádilhan Erjanovtyń toǵyzynshy tolyqmetrajdy kórkem filmi. Túsirilim jumysy byltyr Almaty oblysynda ótti. Filmniń bas prodiýserleri: Ásel Sádýaqasova, Qanat Bitemirov jáne Erbol Toibaev.
«Men úshin Kermek keiipkerlerimizdiń ishindegi eń meiirimdisi, onyń qazirgidei kúrdeli ýaqytta paida bolýynda da bir mán bar. Árine, «Kókjiekter» baǵdarlamasyna qatysatynymyzǵa qýanyshtymyn. Meniń oiymsha, Venetsiia kinofestivaliniń buryńǵy formatta ótýiniń ózi, tusaýkeseri bolatyn kez kelgen film úshin úlken sáttilik. Osyndai múmkindik úshin festival irikteýshilerine jáne shyǵarmashylyq ujymǵa alǵys aitamyn», - dedi Ádilhan Erjanov.
Film qazaqstandyq «Bonni men Klaidtyń» oqiǵasyn baiandaidy. Túrmeden shyǵyp, elge oralǵan Kermek esimdi jas jigit, óziniń týyp-ósken qalasynda belgili bir qylmystyq toptyń óz zańdaryn ornatqanyn kóredi. Eva atty súiiktisi de osy adamdardyń qysym kórsetýimen teris jolǵa túsip ketken, Kermek te qylmysqa belshesinen batýǵa májbúr bolady. Degenmen ol súigen qyzben birge erkindikke qol jetkizip, kinoteatr salý týraly armanyn iske asyrmaq bolady...
Kermekti reseilik akter Azamat Nyǵmanov oinaidy. Kórermender ony Aleksei Mizgirevtiń «Konvoi», Andrei Shalopanyń «28 panfilovshylar» kartinasy arqyly biledi. Evanyń rólin Nariman Tórebaevtyń «Griaz bolshogo goroda», Álisher Súleimenovtiń «Shatyr ústindegi bult» kartinalaryna túsken qazaqstandyq jas aktrisa Kamila Nuǵmanova somdaidy. Eki akter de Erjanovtyń kartinasyna alǵash ret túsip otyr. Jambas esimdi qylmyskerdiń rólin osyǵan deiin rejisserdiń «Atbaidyń shaiqasy» jáne «Ulbolsyn» filmderine túsken akter Sanjar Mádi oinaidy. Sonymen qatar, filmge Erkin Ǵubashev jáne Erjan Jamanqulov túsken, olar Erjanovtyń basqa da kartinalaryna qatysqan bolatyn.
Filmniń stsenarii avtorlary - Ádilhan Erjanov pen Inna Smailova. Prodiýserlik mindetti rejisserdiń turaqty áriptesteri Serik Ábishev pen Olga Hlasheva atqardy. Kartinanyń ko-prodiýseri frantsýz mamany Giiom de Siel. Filmniń operatory osyǵan deiin Ádilhan Erjanovtyń «Úkili kámshat» jáne «Atbaidyń shaiqasy» filmderin taspalaǵan – Erkinbek Pitiráliev. Qoiýshy-sýretshi – Ermek Ótegenov, mýzykasyn jazǵan qazaqstandyq tanymal kompozitor Alim Zairov.
