Qazaqstanda advokattar tapshy. Bul týraly Májiliste «Notariat jáne advokatýra institýttaryn odan ári damytý jáne reformalaý» taqyrybynda Úkimet saǵatynda QR Ádilet ministri Marat Beketaev málim etti, dep habarlaidy QazAqparat.
«Qazirgi kezde elimizdiń advokatýrasy Respýblikalyq advokattar alqasymen jáne 16 aýmaqtyq alqamen qamtylyp otyr. Qorǵaýshylar korpýsynyń jalpy sany tórt myńǵa jýyq. Degenmen de búginde Qazaqstanda advokattardyń jetispeýshiligi baiqalýda, iaǵni olardyń qazirgi sany azamattardyń zańgerlik kómekke tolyqqandy qoljetimdiligine jetkiliksiz», - dep toqtaldy ministr.
Onyń sózine qaraǵanda, elimizde shamamen bir qorǵaýshyǵa shaqqanda shamamen 3 900 azamattan keledi. Máselen, bul kórsetkishke Italiiada -260, Germaniiada - 500, al Angliiada 900 adamnan tiesili. Búginde advokattardyń jetispeitindigi týraly máseleni Joǵarǵy Sotta da kóterilýde.
«Elimizde osyndai qyzmetterge muqtaj azamattar ony tiisti deńgeide almaýda nemese qyzmettiń quny tym joǵary. 2013-ten 2016 jyl aralyǵynda qorǵaýshylardyń sany birshama ósti, iaǵni shamamen 300 adamǵa artty», - deidi Beketaev.
Búginde osy kásipke kirý úshin qoldanystaǵy rásimge jasalǵan taldaýǵa toqtalatyn bolsaq, advokat bolý úshin joǵary zańgerlik bilimdi meńgerip, advokattar alqasynda alty aidan bir jylǵa deiingi merzimde taǵylymdamadan ótýi tiis. Sonymen qatar olar attestatsiiany eńserip, qorǵaýshylar alqasy músheligine enýi qajet.
«Taǵylymdama aqyly jáne onyń quny jylyna 140-tan 280 myń teńgege deiin. Alqanyń quramyna ený úshin óńirlerge bailanysty bastapqy jarna 700-den 800 myń teńgege deiin jetedi. Zańǵa sáikes, jarnanyń mólsherin anyqtaý oblystyq advokattar alqasynyń quzyryna tiesili. Osy arqyly advokat mártebesin alý úshin birneshe kúrdeli rásimnen ótip, 1 mln. teńgege jýyq qarjy tóleý qajet bolada», - dep naqtylady vedomstvo basshysy.
Osy oraida Ádilet ministrligimen atalǵan mamandyqqa qoljetimdilikti jeńildetý úshin Respýblikalyq advokattar alqasymen birlese bastapqy jarnany 100 AEK-ke deiin (226 900 teńge) jáne taǵylymdamany aiyna 5 AEK-ke deiin (11 345 teńge) tómendetý máselesi qaralýda.
