QR Ádilet ministri Qanat Mýsin ortalyq kommýnikatsiialar qyzmetinde ótken brifingide jýrnalisterdiń Senat ǵimaratynyń jertólesinde jumys isteýi týraly pikir bildirdi, dep habarlaidy QazAqparat.
«Keshegi Parlament qabyrǵasynda BAQ-qa qatysty qabyldanǵan erejede Prezidenttiń aqparat erkindigi týraly aityp júrgen ustanymdary eskerilmei qaldy. Jýrnalister depýtattardan suhbatty arnaiy bannerde ǵana alýy kerek degen sheshim qabyldandy. Búgin Senatta jýrnalister jertólede ornalasqan baspasóz ortalyǵynda otyrýǵa májbúr boldy. Bul Prezident Joldaýy men Konstitýtsiianyń sóz bostandyǵy týraly talaptaryna qaishy emes pe?» -dep surady BAQ ókili ortalyq kommýnikatsiialar qyzmetinde ótken brifingide.
Ádilet ministriniń aitýynsha, bul zańǵa qaishy emes.
«Ár organ jýrnalistermen jumysyn uiymdastyrǵanda óz erejesin shyǵarady. Munda jýrnalisterge depýttarmen qatynasyp, suraq qoiýǵa eshqandai shekteý qoiylyp otyrǵan joq. Iaǵni ár mekemeniń óz tártibi bolady. Munyń zańǵa eshqandai qaishylyǵy joq»,- dep jaýap berdi Qanat Mýsin.
Sondai-aq, ol BAQ týraly jańa zań ázirlenip jatqanyn eske saldy.
«Prezidenttiń Joldaýyn iske asyrý úshin buqaralyq aqparat quraly týraly jańa zań shyǵarylady. Zań jobasy pysyqtalyp jatyr. Qoǵam men jýrnalister tarapynan kóterilgen máseleler, Prezident nusqaǵan baǵyttardyń bári sol zań jobasynda kórsetiledi», - dedi vedomstvo basshysy.
Eske salsaq, Búgin Senattyń jalpy otyrysynda «Qazaqstan Respýblikasynyń keibir zańnamalyq aktilerine balanyń quqyqtaryn qorǵaý, bilim berý, aqparat jáne aqparattandyrý máseleleri boiynsha ózgerister men tolyqtyrýlar engizý týraly» zań jobasy eki oqylymda qaralyp, Májiliske qaitarylǵan bolatyn.
